नेपालीले एक वर्षमा कति करोडको छाता ओढ्लान त ?

Posted on: June 08, 2019 | views: 7894

काठमाडौ ।
बर्खा लागिसक्यो। बिहान घमाइलो भए पनि दिनभर कतिखेर पानी पर्ने हो पत्तो हुँदैन।बर्खे पानीबाट बच्न बटुवाले छाता बोक्न थालेका छन् अनि बाइकवालाले रेनकोट। काठमाडौंमा सडक जलाम्य हुने भएकाले पानीमा बाइक कुदाउनुपर्छ, जोगिन ‘रेनकोट’ बोक्नैपर्छ।

वर्षायामलाई लक्षित गरेर मुलुकमा बर्सेनि करोडौंका छाता र रनेकोट आयात हुने गरेकोे छ। तयारी छातामात्र होइन, छाता बनाउन प्रयोग हुने कपडा पनि विदेशबाटै आयात हुन्छ। चालू आर्थिक वर्षको पछिल्ला १० महिनामा ५७ करोड ९३ लाख २९ हजारभन्दा बढी मूल्यका छाता र रेनकोट आयात भएका छन्

। मुलुकमै छाता र रेनकोट उत्पादन हुनसके करोडौं रुपैयाँ विदेशिनबाट रोकिन सक्छ।

भन्सार विभागको तथ्यांकअनुसार १० महिनामा मुलुकमा ३१ करोड ३७ लाख ९१ हजार ६ सय रुपैयाँका ३६ लाख ५९ हजार ४ सय ७ छाता थान भित्रिएका छन्।

१० महिनामा ३६ लाख ५९ हजार थान छाता र ४ लाख ९३ हजार थान रेनकोट भित्रिए

१० महिनाको अवधिमा २६ करोड ५५ लाख २९ हजार रुपैयाँका ४ लाख ९३ हजार ५ सय ९१ थान रेनकोट भित्रिएका छन्।

सरकारले सुरु गरेको प्रधानमन्त्री रोजगार कार्यक्रममा प्रत्येक बेरोजगार नेपालीलाई वर्षको कम्तीमा सय दिन रोजगारी दिने उल्लेख छ। छाताजस्ता कैयौं वस्तु मुलुकमै उत्पादन गर्न सकिए पनि कार्यक्रममा उल्लेख छैन।

कृषिजन्य उत्पादनको आयात पनि उस्तै छ। धनियाँ, कागतीदेखि पूजामा प्रयोग हुने जौंसम्म बाहिरबाट ल्याउनुर्छ। भाषणभन्दा योजनाबद्ध काम गर्न सक्ने हो भने यी उत्पादनको आयात घटाउन सकिन्छ। यसबाट रोजगारी सिर्जनासँगै आयात रोकिन सक्छ। परिणामस्वरुप, बर्सेनि अर्बौं रुपैयाँको व्यापारघाटा कम हुदै जानसक्छ।

मुलुकमै साना उद्योग स्थापना गर्ने वातावरण बनेको छैन्। व्यवसायीले अझै मुलुकभित्र लगानीको वातावरण नबनिसकेको बताइरहेको बेला छाताजस्ता सयौं वस्तु विदेशबाट आयात भइरहेका छन्।

विभागको तथ्यांकअनुसार विभिन्न शीर्षकमा छाताको आयात भएको छ। सबैभन्दा धेरै ‘अम्रेला एन्ड सन अम्रेला’ शीर्षकमा ३३ लाख ६४ हजार ७ सय ३६ थान छाता आयात भएका छन्। यी ल्याउँदा मुलुकबाट २७ करोड ६७ लाख ८३ हजार बाहिरिएको छ।

त्यस्तै, ‘गार्डेन अर सिमिलर अम्रेला’ शीर्षकमा ३ करोड ६९ लाख ८९ हजार मूल्यका २ लाख ९३ हजार २ सय ६८ थान छाता आयात भएका छन्। अर्को शीर्षक ‘अम्रेला एन्ड सन अम्रेला’ शीर्षकमा १ हजार ४ सय ३ छाता १ करोड १३ लाख रुपैयाँमा ल्याइएको छ।

छाताको डाडी (रिब)मा प्रयोग गर्ने कपडा भनेर ४८ हजार केजी कपडा आयात भएको छ। उक्त कपडाको मूल्य ९१ लाख रुपैयाँ छ।

मुलुकमा आइरहेका रेनकोटको मूल्य छाताकोभन्दा केही कम छ। विभिन्न शीर्षकमा रेनकोट आयात भइरहेका छन्। पुरुषले लगाउने रेनकोट, महिलाले लगाउने रेनकोट र गाडीमा प्रयोग गर्ने रेनकोट भनेर उल्लेख गरिएको छ।

आयातित रेनकोटमध्ये पुरुषले लगाउने र कार छोप्न प्रयोग गरिने रेनकोटको आयात ठूलो छ। पुरुष र कारको लागि भनेर आयात भएको रेनकोको मूल्य २६ करोड ४ लाख ३७ हजार छ, जसको संख्या ४ लाख ८३ हजार ३ सय ५३ थान उल्लेख गरिएको छ।

त्यस्तै, महिलाले प्रयोग गर्ने रेनकोट १० महिनाको अवधिमा १० हजार २ थान आयात भएको छ। यसको मूल्य ५० लाख ९२ हजार उल्लेख छ।

केही दिनअघि अर्थमन्त्री युवराज खतिवडाले आयात बढ्यो भनेर आत्तिन नपर्ने बताएका थिए। उनले भनेका थिए–औद्योगिक क्षेत्रमा प्रयोग हुने वस्तुको आयात ठूलो देखिए पनि त्यसले भविष्यमा उत्पादनमै सहयोग गर्छ।

तर, छाताजस्ता दैनिक चााहने सामानको आयातले मुलुकभित्र उत्पादनशीलता बढ्दैन। तर, सरकारको लागि राजस्व संकलन भने हुन्छ। १० महिनामा छाता आयातबाट मात्र सरकारले साढे ९ करोडभन्दा बढी राजस्व असुल गरेको छ। रेनकोटबाट पनि ९ करोड हाराहारीमा राजस्व उठाएको नेपाल न्यूज डटकममा समाचार छ ।