नयाँ एकाई स्थापना गर्न प्रहरीको अभाव

Posted on: April 15, 2019 | views: 4358

काठमाडौ । स्रोत साधन र जनशक्तिको अभावमा माग अनुसारको नयाँ युनिट स्थापना गर्न नसकिएको सशस्त्र प्रहरीले जनाएको छ । सशस्त्र प्रहरी महानिरीक्षक शैलेन्द्र खनालले सोमबार आफ्नो एक वर्षे कार्यकालको विवरण सार्वजनिक गर्दै नयाँ युनिटको माग आए पनि स्थापना गर्न नसकिएको बताएका हुन् ।

हलचोकस्थित सश्स्त्र प्रहरीको मुख्यालयमा पत्रकार सम्मेलन गरी उनले नयाँ युनिट स्थापनाका लागि एक सय ६९ वटा स्थानबाट माग आएको बताए ।

खनालले ठूला जलविद्युत आयोजनालगायत राष्ट्रिय गौरवका आयोजनाहरुमा सशस्त्र प्रहरी बलको माग भइरहे पनि जनशक्तिको अभावमा नयाँ युनिट राख्न सक्ने अवस्था नरहेकोे स्पष्ट पारे ।

सूचनामा सबैको पहुँच पु-याउने उद्देश्यका साथ सशस्त्र प्रहरीले नयाँ मोबाइल एप्स सोमबारबाटै संचालनमा ल्याइएको छ । मातहतका कर्मचारी र सशस्त्र प्रहरी बलबारे सर्वसाधारणलाई जानकारी लिन सहजहोस् भन्ने उद्देश्यले एप्स संचालनमा ल्याइएको खनालले बताए ।