दुई दिनदेखि रोकिएको उपत्यकाको फोहर बिसर्जन सुचारु

Posted on: April 04, 2019 | views: 11012

नुवाकोट । ट्रिपरको ठक्करबाट एक बालकको मृत्यु र एक बालक घाइते भएको बिरोधमा काठमाडौ उपत्यकाको फोहर बिसर्जनमा नुवाकोट स्थित सिसडोलका स्थानीयवासीले पु-याएको अबरोध आज बिहानदेखि हटेको छ ।

महानगरीय प्रहरी वृत्त बालाजुमा बुधबार साँझ भएको सहमतिमा पीडित पक्षले राखेका सबै माग सम्बोधन भएसगैँ दुई दिनदेखि अबरुद्ध फोहर सञ्चालनमा आएको हो । स्थानीयवासीको अबरोध हटेसगै फोहर बोकेका एकसय भन्दाबढी कन्टेनर सहितका गाडी बिसर्जनको लागी काठमाडौबाट ओखरपौवा स्थित सिसडोलतर्फ लागेका छन् ।

काठमाडौबाट फोहर बोकेर आएको ट्रिपरको ठक्करबाट मंगलबार नुवाकोटको ककनी गाँउपालिका–२ स्थित सिसडोलका १३ वर्षीय संजोक नेपालीको मृत्यु र १२ वर्षीय राजन नेपाली गम्भीर घाइते भएका थिए । उक्त घटनामा ज्यान गुमाएका बालकको परिवारलाई राहत स्वरुप रु एक्काइस लाख उपलब्ध गराउने, घाइते बालकको उपचार खर्च ब्योहोर्ने र मृत्तक व्यक्तिको परिवारका एक सदस्य र घाइते बालकलाई कक्षा १२ सम्म सामुदायिक विद्यालयमा अध्ययनको लागी लाग्ने खर्च उपलब्ध गराउने सहमति भएअनुसार फोहर बिसर्जनमा पु¥याएको अबरोध सुचारु भएको ककनी गाँउपालिका–२ का वडाध्यक्ष केदार पौडेलले जानकारी दिनुभयो ।

उहाँको अनुसार पीडित पक्षको माग सम्बोधनको लागी ललितपुर महानगरपालिका, ठक्कर दिने गाडी धनी र फोहरमैला ब्यवस्थापन संघ (स्वमान)ले सहमति जनाएका छन् ।