विश्व अटिजम दिवस: विशेष स्कूल तथा पुर्नस्थापना केन्द्रको जनचेतना फैलाउने विशेष कार्यक्रम

Posted on: April 02, 2019 | views: 6548

काठमाडौं । विशेष स्कूल तथा पुर्नस्थापना केन्द्र पेप्सीकोलाले विश्व अटिजम सचेतना एवं अभिभावक दिवस विशेष कार्यक्रम गरि मनाएको छ । नेपाल प्रहरी प्रमुख प्रहरी महानिरीक्षक सर्वेन्द्र खनाल प्रमुख अतिथिमा मनाईएको कार्यक्रममा नेपाली सेनाका महासेनानी मनोज बैदार, वरिष्ठ पत्रकार सुमन खरेल, गायक प्रमोद खरेल लगायतको सहभागिता रहेको थियो । अटिजम भएका बालबालिकाको हेरचाह, उपचार र अध्ययनको लागि काम गरिरहेको संस्थाले आज परेको विश्व अटिजम दिवसमा विशेष कार्यक्रम गरेको हो । सन् २००८ पछि अप्रिल २ तारिखमा यो दिवस मनाउने गरिन्छ । बालबालिकामा जन्मजात हुने अटिजमबारे जनचेतना तथा सचेतना फैलाउने उद्देश्यले विशेष कार्यक्रम गरेको संस्थाकी अध्यक्ष सविता उप्रेतीले जानकारी दिइन् ।

विश्व स्वास्थ्य संगठनका अनुसार विश्वको कुल जनसंख्या मध्ये एक प्रतिशतमा अटिजम हुने गर्छ । त्यही आधारमा हेर्दा नेपालमा तीन लाखको हाराहारीमा अटिजम भएका व्यक्तिहरु रहेको अनुमान रहेको छ । करिब दश वर्षदेखि अटिजम केयर तथा सचेतनामा सक्रिय सविताका अनुसार अटिजम आफैमा रोग होइन । गर्भावस्थामा नै शिशुको विकासका क्रममा नशा र तन्तुको विकासका क्रममा सन्तुलन नहुँदा न्यूरोन छुट्न गइ यस्तो अवस्थाका बालबालिका जन्मिने गर्छन् ।

यो अवस्थाका बालबालिकालाई उपचार गरेर निको बनाउन सकिँदैन । तर उनीहरुमा सञ्चार सीप, सामाजिकीकरण तथा नियमित गर्नुपर्ने कामहरु दोहोर्याउने सीपको विकास भने गराउन सकिन्छ । त्यसको लागि अभिभावकले विशेष हेरविचार र यसबारे जानकारी राख्न जरुरी रहेको उनको भनाइ छ । सो अवसरमा संस्थालाई विभिन्न माध्यमबाट सहयोग गर्ने व्यक्ति तथा संस्थालाई सम्मानको गरेको थियो ।

अटिजम दिवसको अवसरमा वरिष्ठ पत्रकार सुमन खरेल,महिला खबरका फिचर संयोजक प्रतिमा सिलवाल,, स्वास्थ्य पत्रकार मञ्चका अध्यक्ष कल्पना आचार्य, महिला न्यूज अनलाइनका सम्पादक लक्ष्मी बस्नेत, जनता टेलिभिजनका पत्रकार प्रतिमा चौधरी, पत्रकार विष्णुकुमार क्षेत्री, रिसेन्ट नेपाल डटकमका अर्जुन न्यौपाने तथा विभिन्न सञ्चार संस्थालाई सम्मान गरिएको थियो ।

साथै संस्थाका उत्कृष्ट बालबालिका आदेशराज काफ्ले, अलिसा न्यौपाने, जेष्ठ अभिभावक नर्वदा भण्डारी लगायतलाई सम्मान गरिएको थियो । साथै अटिजम भएका बालबालिकाले आफ्नो विशेष प्रस्तुती देखाएका थिए ।