लोकप्रिय पूर्व अर्थमन्त्री वाम आन्दोलनका लोकप्रिय नेता भरतमाेहन अधिकारीकाे निधन

Posted on: March 03, 2019 | views: 7284

काठमाडौं । नेपाल कम्युनिष्ट पार्टी (नेकपा)का नेता, पूर्व उपप्रधानमन्त्री एवं अर्थमन्त्री भरतमोहन अधिकारीको निधन भएको छ । करिब सात दशक लामो समय वाम आन्दोलनमा समर्पित गर्दै राजनीतिक परिवर्तनमा महत्वपूर्ण योगदान पुर्‍याएका अधिकारीको ८२ वर्षको उमेरमा शनिबार साँझ धुम्बाराहीस्थित ह्याम्स अस्पतालमा निधन भएको हो ।

श्वासप्रश्वास, मुटु र फोक्सोमा समस्या देखिएपछि २३ पुषदेखि अधिकारीलाई ललितपुरको मेडिसीटी अस्पतालमा राखिएको थियो । तर, स्वास्थ्यमा थप सुधार नभएपछि चिकित्सकहरुको सल्लाहमा २४ माघमा ह्याम्स अस्पताल सारिएको थियो । स्वास्थ्यमा थप समस्या देखिएपछि १६ दिनदेखि भेन्टिलेटरमा राखेर गरिएको उपचारले पनि स्वास्थ्यमा सुधार भएन । तीन दिनदेखि अधिकारी अचेत थिए ।

महोत्तरीको भ्रमरापुरा विस १९९३ साल वैशाख २२ गते जन्मिएका अधिकारीको स्थायी ठेगाना भने मोरङको विराटनगर हो । उनी मोरङ क्षेत्र नं. २ बाट ०४८, ०५१ र ०५६ मा गरि तिन पटक प्रत्यक्ष निर्वाचित भए । एकपटक संविधानसभामा सभाषद् थिए ।

२००८ सालदेखि सक्रिय कम्युनिष्ट राजनीतिमा लागेका उनी ४ वर्ष भूमिगत, ३ वर्ष निर्वासन र ३ वर्ष जेल जीवन बिताएका थिए । अधिकारी स्वच्छ छविका नेताका रुपमा चिनिन्थे । नेपालमा औद्योगिकरणका समस्या, मेरो जीवन यात्रा भाग १ र भाग २ अधिकारीका प्रकाशित कृति हुन् ।

२०५१ साल मंसिर १४ गठन भएको पहिलो कम्युनिष्ट सरकारमा उनी अर्थ मन्त्री बनेका थिए । उनका सहोदर दाई मनमोहन अधिकारी प्रधानमन्त्री थिए । सरकार गठन भएको एक महिना पनि बित्न नपाउँदै पुस १४ गते उनले वजेट प्रस्तुत गरेका थिए । सो वजेटले जनस्तरमा निकै लोकप्रियता पाएको थियो । आफ्नो गाउँ आफै बनाउँ, ७५ वर्ष उमेर पुगेका वृद्धवृद्धालाई भत्ता उपलब्ध गराउने जस्ता कार्यक्रमहरु लागू हुँदा सरकारले जनस्तरमा गहिरो छाप छाड्यो ।

नौं महिने छोटो समयको सरकारले गरेका कामहरुले दीर्घकालिन रुपमा राम्रो प्रभाव पर्न गयो । अधिकारीले अघि सारेको बजेटका कारण तत्कालीन एमालेमा समेत लोकप्रियता बढ्न गयो । त्यतिबेला देखि आफ्नो गाउँ आफै बनाउँ कार्यक्रम अन्तर्गत प्रत्येक गाविसमा तीन÷तीन लाख रुपैयाँ रकम नियोजन गर्न थालिएको हो ।

पछि क्रमैसँग वृद्ध हुँदै उल्लेख्य मात्रा बजेट विनियोजन हुन लाग्यो । एक सय रुपैयाँबाट वृद्धा भत्ता सुरु गरिएकोमा पछिल्ला सरकारले क्रमशः वृद्धि गर्दै दुई हजार पुगेको छ । अधिकारी अर्थ मन्त्री हुँदा कालिगण्डकी जलविद्युत आयोजनाको निर्माण कार्य सुरु, गंगालाल हृदयरोग केन्द्र स्थापना भएको हो ।

तत्कालीन सरकारले ल्याएको नौं ‘स’ को अवधारणा पनि लोकप्रिय बनेको थियो । ठूला जलविद्युत आयोजनासँगै गाउँमा सिंचाइको प्रबन्धन गर्ने कार्यक्रम बजेट मार्फत सार्वजनिक गरेको थियो । उनले ल्याएको वजेटले लोक कल्याणकारी राज्यको अनुभूति दिलाएको थियो । त्यतिबेलै भूमिसुधारको काम अघि बढेको थियो ।

सुकुम्बासी समस्या समाधान आयोग बनाएर ६० हजार सुकुम्बासीलाई जग्गाधनी पूर्जा वितरण गरिएको थियो । आफ्नो गाउँ आफै बनाउँ कार्यक्रमलाई विश्व वैंकले नेपालको ५० वर्षको इतिहासमा सबै भन्दा प्रभावकारी विकासको कार्यक्रम भनि रिपोर्ट तयार पारेको थियो । अधिकारीले अर्का पटक अर्थमन्त्री हुँदा सुत्केरी भत्ताको पनि सुरुवात गरे ।