स्याफ्रुबेसी–रसुवागढी सडकको चीन सरकारबाट स्तरोन्नति थालिदै

Posted on: January 27, 2019 | views: 6166

नुवाकोट । चीनसँगको रसुवागढी नाकालाई लक्षित गरी स्याफ्रुबेसी–रसुवागढी सडकको स्तरोन्नतिको काम तत्काल सुरु हुने भएको छ । यो खण्डको स्तरोन्नतिको लागि चीनले बोलपत्र आह्वान गरी निर्माण व्यवसायी छनोटको तयारी थालेको छ ।
अब काम थाल्न तयारी सुरु गरिएको सडक विभागमा विकास सहायता कार्यान्वयन महाशाखा प्रमुख कुवेशकुमार शर्माले बताउनुभयो । उहाँको अनुसार यो खण्डको विस्तृत परियोजना प्रतिवेदन (डिपिआर) तयार भएर विभागले त्यसलाई स्वीकृत गरेपछि चीनले टेण्डर गरेको थियो ।


चीनले स्तरोन्नति गर्ने यो सडक खण्ड १६ किलोमिटर दुरी छ । चीनले यो सडक खण्ड दुई लेनमा विस्तार गर्ने गरी काम अघि बढाउन नेपाल सरकारसंग समझदारी गरेको छ ।
हाल यो सडक खण्ड साँघुरो हुँदा रसुवागढीबाट समान लिएर आउने गाडीलाई पनि चल्न मुस्किल पर्ने अवस्था छ । विभागमा अनुसार केही ठाउँमा जटिल भूगोल भएकाले स्तरोन्नतिको काम चुनौतिपूर्ण देखिएपछि नेपाल सरकारले चीन सकारलाई नै काम गर्ने जिम्मेवारी दिएको हो ।


शर्माका अनुसार यो सडक चीनले अनुदान सहयोगमा बनाइदिन लागेको हो । विभागले हाल सडक सीमाभित्र रहेका घर टहरा हटाउने र विद्युतका पोल सार्ने लगायतका काम गरिरहेको छ । यो काम सकिएलगत्तै चीनले सडक निर्माणको काम सुरु गर्ने जनाएको छ ।
चीनले स्याफ्रुसम्मको सडक निर्माणको तीन वर्षभित्र यस  सडकको स्तरोन्नति सकाउने महाशाखा प्रमुख शर्माले बताउनुभयो ।
नेपाली सेनाले मैलुङदेखि स्याफ्रुबेसीसम्मको १७ किलोमिटर सडक निर्माण गरिसकेको छ । तर, यो खण्ड गत बर्खायामको पहिरोले क्षति पुगेर चल्न नसकेपछि हाल स्तरउन्नतीको काम थालिएको छ । अहिले स्याफ्रुबेसीबाट धुन्चे हुँदै आउने सडकमार्गको स्तारेन्नती भइरहेपनि भूगलेका हिसावले यो निकै जटिल छ ।


अब सेनाले ट्रयाक खोलेर सञ्चालनमा ल्याएको बेत्रावती–मैलुङ–स्याफ्रु सडक खण्ड पनि नेपाल सरकारको आफ्नै लगानीमा कालोपत्रे गर्ने योजना बनाएको छ । त्यसका लागि डिजाइनको काम भइरहेको छ ।
यदि यो खण्ड पनि स्तरोन्नति भए चीनको रसुवागढी नाका पुग्न सहज किसिमको मार्ग तयार हुनेछ । भूकम्पपछि सिन्धुपाल्चोकको तातोपानी नाका बन्द भएपछि मात्रै सरकाले रसुवागढी नाकासम्म पुग्ने सडकलाई सवारीमैत्री बनाउन प्रयास थालेको थियो ।


चीन सरकारले हाल केरुङतर्फको भन्सार नाकालाई नै बढी प्राथमिकता दिइरहेको छ । नेपाल सरकारले रसुवागढी जाने वैकल्पिक मार्गको खोजी गर्दै खोलाको किनारै–किनार नयाँ सडकको ट्रयाक खोलेको हो । त्रिशुलीबाट धुन्चे हुँदै स्याफ्रु पुग्ने सडकका विभिन्न स्थानमा ठूला पहिरोहरु छन् । यो मार्गमा भएका पुलहरु पनि जोखिमयुक्त आवस्थामा छन् ।