जोखिममा परेकी सुत्केरीलाई सेनाको रगतले बचायो (भिडियो सहित)

Posted on: January 03, 2019 | views: 11005

रामहरि न्यौपाने,
नुवाकोट । रसुवाको नौकुण्ड गाँउपालिका–४ सरमथलीका सिताकुमारी मोक्तान सुत्केरी हुदाँ अत्याधिक रक्तश्राव भएपछि नेपाली सेनाले उपलब्ध गराएको रगतबाट जोखिमुक्त हुनुभएको छ ।
व्यथाले च्यापेपछि सोमबार जिल्ला अस्पताल त्रिशूली भर्ना हुनुभएका २३ वर्षीय मोक्तान सामान्य अबस्थामा सुत्केरी भएपनि अत्याधिक रक्तश्रावले जोखिम बनेको शरिरमा आवश्यक रगत पुस १८ गते बुधबार नेपाली सेनाले उपलब्ध गराएको हो ।


चार प्रिन्ट रगत आवश्यक पर्नेमा बाँकी सुत्केरीका जेठाजु दिलबहादुर मोक्तान र बट्टारका ओम अमात्यले दिनुभएको हो ।सुत्केरीलाई आवश्यक ‘बी पोजेटिभ’ समूहको रगत अभाव भएपछि श्रीनाथ गण देवीघाटमा कार्यरत सहसेनानी विद्युतकुमार बस्नेत र सिपाही अजय चौधरीले पुस १८ गते बुधबार अस्पतालमा नै पुगेर रगत दान गरेका हुन् ।

“पहिलो सन्तानको रुपमा छोरी जन्माएकी मोक्तानको शरीरको रगत निकै खेर गएर शरीर शिथिल भएको थियो ।” जिल्ला अस्पतालका डा.मधुकर दाहालले भन्नुभयो “दाताको सहयोगमा चार प्रिन्ट रगत दिएर बचाएका छौ ।”



नुवाकोट सहित रसुवा र धादिङका बिरामीलाई सेवा पु-याउदै आएको जिल्ला अस्पताल त्रिशूलीमा नेपाल रेडक्रस सोसाइटी नुवाकोट शाखाले रक्तसञ्चार केन्द्र स्थापना गरी रगत उपलब्ध गराउदै आएपनि हाल अभाव चर्किएको छ ।
दाताहरुमा जनचेतनाको अभाव र नियमित रक्तदान कार्यक्रम नहुदाँ पछिल्लो समय रगतको अभाव भएको केन्द्रका प्रमुख लक्ष्मी श्रेष्ठले बताउनुभयो ।

यहाँ रगत अभाव हुदाँ नेपाली सेनाबाट आवश्यक रगत उपलब्ध गराई धेरै बिरामीको ज्यान बचाउन सहयोग पुग्दै आएको छ ।