त्रिशूलीमा बेपत्ता तामाङको खोजी सुरु

Posted on: December 20, 2018 | views: 17756

पैरेवेसी । चोरीमा संलग्न रहेको अभियोगमा पक्राउ परेका रसुवाको उत्तरगया गाँउपालिका–२ का मैते तामाङको खोजी आज बिहानदेखि सुरु भएको छ ।
नेपाल प्रहरी, सशस्त्र प्रहरी सहितको करीब एक सय जनाको टोली तामाङ हराएको स्थान पेरैवेसी स्थित त्रिशूली नदीमा खोजीमा परिचालन भएका छ ।


माथिल्लो त्रिशूली थ्री ‘ए’ जलविद्युत आयोजनाको निर्माण सामाग्रि चोरीको अभियोगमा पक्राउ परेका चार मध्ये १९ वर्षीय मैते तामाङ भाग्ने क्रममा बुधबार अपरान्ह नदीमा बेपत्ता भएको जिल्ला प्रहरी कार्यालयका प्रहरी नायव उपरीक्षक भीमलाल भट्टराईले जानकारी दिनुभयो ।  


थ्री ‘ए’को निर्माण साामग्रि चोरी गरेको अभियोगमा पक्राउ परेका मैते तामाङ सहित उत्तरगया–२ का कोमल तामाङ, विकास परियार र नुवाकोटको विदुर नगरपालिका–३ का लक्ष्मी नेपालीलाई आवश्यक अनुसन्धान र कारबाहीको लागी जिल्ला प्रहरी कार्यालय नुवाकोटमा ल्याउन लागिएको थियो । सोही क्रममा किस्पाङ–५ स्थित पैरेबेसी भन्ने स्थानमा आएपछि शौच गर्ने बाहनामा भाग्ने क्रममा मैते तामाङ नदीमा बेपत्ता भएको प्रहरीले जनाएको छ ।
घटनाको बिरोधमा आक्रोशित स्थानीयबासीले बुधबार मैलुङ प्रहरी चौकी तोडफोड गरी दुई प्रहरीलाई घाइते बनाइदिएका थिए ।


यस्तै, प्रहरीको एकवटा गाडीमा पनि क्षति पु¥याइदिएका थिए । प्रहरीले पाँच राउन्ड हवार फायर समेत गरेको थियो ।
घटनालाई लिएर उत्पन्न विवाद समाधानको लागी मैलुङमा सरोकारवालापक्ष बीच छलफल आह्वान गरेको किस्पाङ गाँउपालिका अध्यक्ष छत्रबहादुर लामाले जानकारी दिनुभयो ।