२२औँ जुनियर/युवा रेडक्रस सर्कल गोष्ठि बिन्दुकेशर माविमा जारी

Posted on: December 01, 2018 | views: 4846


टक्सार । नुवाकोट जिल्लास्तरीय २२ औँ जुनियर/युवा रेडक्रस सर्कलको गोष्ठि म्यागङ गाँउपालिका वडा नं. ५ टक्सार स्थित बिन्दुकेशर माध्यामिक विद्यालयमा जारी रहेको छ ।

हिजोदेखि सुरु भएर आजसम्म चल्ने गोष्ठिको उद्घाटन समारोहमा म्यागङ गाँउपालिका अध्यक्ष आशा तामाङले मानवीय सेवाको भावले अन्तराष्ट्रियस्तरमा छवी कमाएको रेडक्रसको उच्चतम सम्मान भएकाले त्यही अनुसार सेवालाई कायम राख्नको लागी विद्यालयतहमा क्रियाशिल जुनियर रेडक्रस सर्कललाई आह्वान गर्नुभएको छ । अध्यक्ष तामाङले भूकम्प पछिको उद्धार र उपचारमा रेडक्रसमा आबद्ध रहेका जुनियर रेडक्रसले पु-याएको भूमिका प्रशंसनीय भएकाले उनीहरुलाई सक्रिय बनाएर सिप, श्रोत र साधनले समेत क्षमतावान बनाउनको लागी सहयोगको प्रतिबद्धता जनाउनुभएको छ ।  

यस्तै, गाँउपालिकाको उपाध्यक्ष शान्ती गुरुङले मानवीय सेवा र निवास्र्थ सँस्थाको रुपमा कायम रहेको सर्कललाई सबै विद्यालयमा उपस्थित गराउनुपर्ने सुझाब दिनुभएको छ । र्दुइदिनसम्म चल्ने गोष्ठि मार्फत सर्कलमा आबद्ध भएका विद्यार्थी र शिक्षक नायकहरुबीच अनुभव आदनप्रदानको लागी समेत प्रभावकारी हुने विश्वास लिएको बताउनुभएको छ ।  

कार्यक्रममा नेपाल रेडक्रस नुवाकोट शाखा सभापति सुरतबहादुर चित्रकारले जुनियर रेडक्रस सर्कल रेडक्रसको अभिन्न अङ्गको रुपमा रहेर संगठन र सहभागिता प्रर्बद्धनमा पु-याउदै आएको योगदान अमूल्य रहेको बताउनुभएको छ ।
नुवाकोटमा रेडक्रसको उच्चतम प्रतिष्ठा कायम रहनुभएमा सर्कलको भूमिकामा रहेका विद्यार्थीहरुको योगदान र सहयोगबाट नै उपलब्धी प्राप्त भएकाले आगामी दिनमा जुनियर सर्कललाई मजबुद बनाउनको लागी क्रियाशिल हुने बताउनुभएको छ ।  

कार्यक्रममा रेडक्रस रसुवा सभापति बाबुलाल तामाङले रेडक्रसको उद्देष्य पूरा गर्नको लागी विद्यालयतहमा स्थापना भएका जुनियर रेडक्रस सर्कल मार्फत विश्वमा नै रेडक्रसको प्रतिष्ठा बनाउन सहयोग पुगेको बताउनुभएको छ । कार्यक्रममा म्यागङ गाँउपालिकाको वडा न ३ का वडाध्यक्ष हरीबहादुर तामाङ, वडा नं. ५ का वडाध्यक्ष रामबहादुर तामाङ, वडा नं. ६ का वडाध्यक्ष आत्तमसिंह तामाङ, रेडक्रस सोसाइटी केन्द्रीय जुनियर विभागका उपनिर्देशक शिवराम गौतम, बिन्दुकेशर विद्यालय व्यवस्थापन समितिका अध्यक्ष मुरलीप्रसाद सापकोटा प्रधानध्यापक ताराप्रसाद श्रेष्ठ, शिक्षक नायक टिकाराम सापकोटा, विद्यार्थी आशिक यादव लगायतले २२ औ जुनियर सर्कलहरुको गोष्ठिले यसअघि पु-याएको भूमिकाको समीक्षा गर्दै आसन्न वर्षको लागी बनाउने भावी योजनामा रेडक्रसका सिद्धान्त र मानवीय सहयोगका कार्यक्रमलाई सुक्ष्म रुपमा समावेश गरी विद्यालयमा गठन भएको सर्कललाई बस्तीसम्म पु¥याउन सुझाब दिनुभएको छ ।

यसैगरी, रेडक्रस नुवाकोट शाखा सदस्य एवम् नेपाल जुनियर रेडक्रस विभाग नुवाकोट संयोजक केशव सुवेदीले खुलासत्र सम्पन्न पश्चात हिजो र आज दुई दिनचल्ने गोष्ठिको बन्द सत्रले यसअघिका कामको समीक्षा गरी भावि रणनीति बनाएर रेडक्रसको भूमिका अझ उच्चतम बनाउन केन्द्रित हुने बताउनुभएको छ ।

कार्यक्रममा रेडक्रस नुवाकोट मार्फत सञ्चालित आपतकालीन कार्यक्रमका कार्यक्रम अधिकृत रबिन दाहाल, नुवाकोट रेडक्रस कोषाध्यक्ष श्रीराम पाण्डे, उपमन्त्री सिता तामाङ, उपकोषाक्ष उद्धवशर्मा रिजाल, जिल्ला सदस्य सुशीला चित्रकार, रेडक्रस देउराली उपशाखा सभापति पारसलाल तामाङ, रेडक्रस रसुवा कोषाध्यक्ष दिनेश तामाङ, रेडक्रस नुवाकोटका सामुदायिक प्रशिक्षक समुन्द्रबाबु अधिकारी, रडक्रस नुवाकोटका विपद् व्यवस्थापन कार्यमा लामो समयदेखि प्रशिक्षकको रुपमा क्रियाशिल रहनुभएका रेडक्रसकर्मीहरु रेमश गिरी, कुमार पाठक, रबिन्द्रनाथ न्यौपाने लगायत जिल्लामा जुनियर रेडक्रस सर्कल गठन भएका विभिन्न विद्यालयका शिक्षक नायक एवम जुनियर रेडक्रसकर्मी विद्यार्थीको सहभागिता रहेको छ ।


गोष्ठिमा नुवाकोटका ८५ भन्दा बढी विद्यालय मध्ये अधिकांश विद्यालय र धादिङको कुण्डलादेवी मावि समेतको सहभागिता रहेको गोष्ठि सञ्चालन भइरहेको विन्दुकेशर माविका शिक्षक मधुसुदन सापकोटाले जानकारी दिनुभएको छ । उहाँको अनुसार हिजोदेखि सुरु भएको गोष्ठिले आज विन्दुकेशर घोषणा पत्र जारी गर्दै अर्को वर्ष नयाँ विद्यालयलाई कार्यक्रम सञ्चालन गर्ने जिम्मेवारी प्रदान गरी सम्पन्न गर्ने योजना लक्ष्य राखिएको छ ।


रेडक्रसको भातृ सस्थाको रुपमा विद्यालयहरुमा क्रियाशिल रहेको जुनियर/युवा रेडक्रस सर्कलले जीवन रक्षा तथा स्वास्थ सुरक्षा सम्बन्धि मानवीय सेवाको साथै जनचेतनाको अभिबृद्धि, रेडक्रसको सिद्धान्त र मानवीय मूल्यको प्रबद्धन, अन्तराष्ट्रिय कानूनको प्रचार, प्रकोप महामारीको न्युनिकरण, त्यसको पूर्वतयारी, उद्धार र राहत वितरणमा सहयोग लगायत मानव सेवाका उच्चतम कार्य गर्दै आएको छ ।