निर्मलाका बुबा यज्ञराजमा किन देखियो अस्वाभाविक लक्षण,यस्तो छ स्वास्थ्य रिपोर्ट

Posted on: November 26, 2018 | views: 9305

काठमाडौं । निर्मला पन्तका बुबा यज्ञराजको कलेजोमा संक्रमण देखिएको छ । छोरीका हत्यारालाई कारबाहीको माग गर्दै धर्नामा रहेका उनको स्वास्थ्य अवस्था बिग्रदै गएपछि आइतबार साँझ त्रिवि शिक्षण अस्पतालमा उपचारका लागि ल्याइएको थियो । प्रारम्भीक स्वास्थ्य परीक्षणमा यज्ञराजको कलेजोमा संक्रमण देखिएको हो । आकस्मिक विभागका डाक्टर तीर्थमान श्रेष्ठका अनुसार उनको कलेजोमा संक्रमणका साथै मुटुको चाल १३० पुगेको छ ।

धर्नामा बसेरहेको अवस्थामा हाँस्ने, रुने, बर्बराउने, गालीगलौज गर्ने जस्ता अस्वाभाविक लक्षण देखिन थालेपछि उनलाई उपचारका लागि काठमाडौं ल्याइएको थियो । चिकित्सकहरूले भिडियोमा आएको जस्तो गम्भीर अवस्था नभएको बताएका छन् । डा.श्रेष्ठले भने, ‘उहाँमा मानसिक समस्या नहुने भन्ने भएन तर, जसरी भिडियोमा देखाएको थियो त्यस्तो अवस्था हामीले पाएनौँ ।’ बाटोमा लट्याउने औषधि दिँदै आएकाले चिकित्सकले उनको अवस्थाका बारेमा भन्न नसक्ने बताएका छन् ।
डा.श्रेष्ठका अनुसार सिटी, एमआरआई, रगतको रिपोर्ट नर्मल देखिएको छ । सडकमा दौडिएकाले देब्रे खुट्टाको दुई वटा औँला भाँचिएको छ । अहिले औँलामा प्लस्टर गरिएको छ । उनलाई जनरल वेडमा सारिएको छ । मानसिक रोग विशेषज्ञको सल्लाह बमोजिम कुनै औषधि चलाइएको छैन । धेरै दिन चिसोमा धर्ना बसेका कारण र पानीको कम प्रयोग, अत्याधिक ज्वरोले पनि कलेजोमा संक्रमण भएको हुन सक्ने चिकित्सकहरूले अनुमान गरेका छन् । उपचारमा संलग्न चिकित्सकका अनुसार यज्ञराजलाई ९९.८ डिग्री ज्वरो आएको छ ।