क्षतिग्रस्त तीन लाख १५ हजार ८९७ घर पुनःनिर्माण

Posted on: November 20, 2018 | views: 4511

विदुर । भूकम्पबाट भत्किएकामध्ये तीन लाख १५ हजार ८९७ घर पुनःनिर्माण सम्पन्न भएको राष्ट्रिय पुननिर्माण प्राधिकरणले जनाएको छ ।
    प्राधिकरणमा प्राप्त तथ्याङ्क अनुसार आठ लाख १२ हजार १६१ लाभग्राहीमध्ये सात लाख ३२ हजार ७७१ ले अनुदान सम्झौता गरेको पाइएको छ । सम्झौता गरेकामध्ये सात लाख २६ हजार ३३३ ले पहिलो किस्ता समेत बुझेर घरको थप निर्माण अघि बढाएका छन् ।

    पहिलो किस्ता लिएर पाँच लाख ६० हजार ७८१ लाभग्राहीले पुनःनिर्माण अन्तिम चरणमा पु¥याएको प्राधिकरणले दाबी गरेको छ । घरको जगतह निर्माण गरी पाँच लाख ३१ हजार १९ भूकम्प पीडितले दोस्रो किस्ता माग गरी थप निर्माणतर्फ लाग्न थालेको बताइएको छ ।

दोस्रो किस्ताका लागि पाँच लाख २२ हजार १९३ परिवार प्रमाणीकरण भएको तथ्याङ्क प्रतिनिधिसभा, विकास तथा प्रविधि समितिको हिजो बसेको बैठकमा प्रमुख कार्यकारी अधिकृत सुशील ज्ञवालीले प्रस्तुत गर्नुभएको छ । अहिलेसम्म पाँच लाख १८ हजार ५५ लाभग्राहीले भुक्तानी पाएको तथ्याङ्कले देखाएको छ । तेस्रो किस्ता माग गर्नेको सङ्ख्या तीन लाख ४४ हजार ३९८ पुगेको पाइएको छ । तेस्रो किस्ताका लागि तीन लाख ३४ हजार ५० भूकम्प पीडित प्रमाणीकरण भइसकेकाले उनीहरुलाई रकम निकासाको प्रक्रियामा राखिको छ । घर निर्माण सम्पन्न गरेका तीन लाख १९ हजार ६६९ परिवारलाई तेस्रो किस्ता अर्थात अन्तिम किस्ता रकम वितरण गरिएको छ ।

    २०७२ वैशाख १२ गतेको भूकम्पले आंशिक क्षति भएका ५४ हजार ६५८ लाभग्राही प्रबलीकरण सूचीमा समावेश भएको तथ्याङ्कले देखाएको छ । त्यो मध्ये ११ हजार ८९५ ले अनुदान सम्झौता गरेका छन  भने १० हजार ४६४ परिवारले पहिलो किस्ता बापतको ५० हजार रुपैयाँस समेत लिएर मर्मतको काम अघि बढाएका छन् । प्रबलीकरण सूचीमा परेकाले दुई किस्तामा एक लाख रुपैयाँ पाउने प्राधिकरणको कार्यविधिमा उल्लेख गरिएको छ । घरको पुनःनिर्माणको लागी भने लाभग्राहीलाई तीन किस्तामा तीन लाख रुपैयाँ दिने कार्यविधिमा व्यवस्था गरिएको छ ।
यसैबीच, राष्ट्रिय पुर्ननिर्माण प्राधिकरणले भूकम्पपीडित निजी आवास अनुदान रकम बुभ्mने समयसीमा निर्धारण गरेको छ । गएको भदौ २१ गतेको प्राधिकरण निर्देेशक समितिको बैठकले पहिलो, दोस्रो र तेस्रो किस्ता अनुदान बुभ्mने समय निर्धारण गरेको सूचना जारी गरेको छ । पहिलो किस्ता लिने निश्चित  समयावधि सकिए पनि अझै धेरै मानिसले अनुदान लिन बाँकी भएकाले काम नरोकिएको सहप्रवक्ता मनोहर घिमिरेले बताउनुभएको छ ।

     गएको असार मसान्तसम्म प्रथम किस्ता प्राप्त गर्ने लाभग्राहीले आगामी पुस मसान्तभित्र दोस्रो किस्ता लिइसक्नुपर्ने प्राधिकरणले जनाएको छ । प्राधिकरणका अनुसार पुस मसान्तसम्म दोस्रो किस्ता प्राप्त गर्ने लाभग्राहीले आगामी वैशाख मसान्तभित्र तेस्रो किस्ता लिइसक्नुपर्ने अनिवार्य गरिएको छ ।

    पहिलो किस्तासमेत प्राप्त नगर्ने लाभग्राहीको हकमा प्राधिकरणले फरक खालको समयसीमा निर्धारण गरेको छ । प्राधिकरणले पहिचान भएका सेवाग्राहीहरूसँग अनुदान सम्झौता सम्पन्न गरी कात्तिक मसान्तभित्र पहिलो किस्ता लिने व्यवस्था मिलाउन आग्रह गरिएको छ ।

यस्तै यही कात्तिक मसान्तसम्म पहिलो किस्ता प्राप्त गर्ने लाभग्राहीले आगामी माघ मसान्तभित्र दोस्रो किस्ता लिइसक्नुपर्ने प्राधिकरणले जनाएको छ । त्यसैगरी माघ मसान्तभित्र दोस्रो किस्ता प्राप्त गर्ने लाभग्रहीले आगमी वर्षको जेठ मसान्तभित्र तेस्रो किस्ता लिइसक्नुपर्ने प्रावधान छ ।

    गुनासो सुनुवाइबाट आएका र पुनः सर्भेक्षण जोखिम वर्ग, परम्परागत बस्ती एवं बस्ती स्थानान्तरणबाट आउने लाभग्राहीका लागि उल्लिखित अनुदान किस्ता प्राप्त गर्ने समयावधि कार्यकारी समितिले निर्धारण गरेअनुसार हुने प्राधिकरणले जनाएको छ ।
    पहिलो किस्ता लिएर पनि निजी आवास पुर्ननिर्माण नगर्ने भूकम्पपीडिले तोकिएको समयावधिमा  रकम सम्बन्धित निकायमा बुझाउन प्राधिकरणले निर्देशन समेत दिएको जनाएको छ ।

यस्तै, प्रदेश नं ३ का मुख्यमन्त्री डोरमणि पौडेलले भूकम्पबाट क्षतिग्रस्त सार्वजनिक सम्पत्ति छिटोभन्दा छिटो निर्माण गर्नुपर्ने बताउनु भएको छ । मुख्यमन्त्री पौडेलले पुर्ननिर्माण प्राधिकरणका प्रमुख कार्यकारी अधिकृत सुशील ज्ञवालीसँग पुनःनिर्माणका विषयमा जानकारी लिने क्रममा भूकम्पबाट प्रभावित भएको प्रदेस नं ३ को पुर्ननिर्माणर्लाइ प्रभावकारी बनाउन नसकेको भन्दै चिन्ता समेत जनाउनुभएको छ ।

उहाँले भूकम्पबाट क्षतिग्रस्त सरकारी भवन, विद्यालय र सर्वसाधारणको भवनको पुनः निर्माणमा ढिलाइ गर्न नहुने र यसमा प्रदेश सरकारको तर्फबाट आवश्यक सहयोग गर्ने आश्वासन समेत दिनुभएको छ । 

    मुख्यमन्त्री पौडेलले जाडो महीना शुरु भइसकेकाले भूकम्पपीडित परिवारलाई यथाशीघ्र घर निर्माण गरी पुनर्वासको व्यवस्था मिलाउनसमेत आग्रह गर्नुभएको छ । जवाफमा प्रमुख कार्यकारी अधिकृत ज्ञवालीले कामलाई तीव्र गति दिई लाभग्राहीलाई पुनःस्थापना गराउन प्राधिकरणले काम गरिरहेको दाबी गर्नुभएको छ ।

    प्रदेश सरकारले भूकम्पबाट ध्वस्त विद्यालयको भौतिक संरचना पुनःनिर्माण दुई वर्षभित्र सम्पन्न गर्न सङ्घीय सरकार र स्थानीय सरकारसँग समन्वय गर्ने नीति तथा कार्यक्रममा उल्लेख गरेको उहाँले बताउनुभएको छ ।