काठमाडौ दुर्घटना : नुवाकोटका दुई जनाको ज्यान गयो

Posted on: October 30, 2018 | views: 9298

१३ कर्तिक, काठमाडौ । काठमाडौँको लैनचौरमा भएको मोटरसाइकल दुर्घटनामा नुवाकोट घर भएका  प्रकाश तामाङको मृत्यु भएको काठमाडौ प्रहरीले जनाएको छ ।


लैनचौरको खानी विभाग अगाडि मंगलबार बिहान ६ बजे बा. २ ख २०६८ नम्बरको माइक्रोबस र बा ६४ प ९२८४ नं को मोटरसाइकल एकापसमा ठोक्किँदा मोटरसाइकल चालक नुवाकोटका ३० वर्षीय प्रकाश तामाङको मृत्यु भएको प्रहरीले जनाएको हो ।


महानगरीय ट्राफिक प्रहरी महाशाखाका सहप्रवक्ता जीतेश दाहालका अनुसार दुर्घटनामा गम्भीर घाइते तामाङको राष्ट्रिय ट्रमा सेन्टरमा उपचारको क्रममा मृत्यु भएको र मोटरसाइकलको पछाडि रहेका अर्का घाइते सुरज थापाको ट्रमा सेन्टरमा नै उपचार भइरहेको छ । दुर्घटनामा परेको सवारी साधनसहित माइक्रो चालकलाई प्रहरीले नियन्त्रणमा लिएको छ ।


यसैबीच, मंगलबार नै काठमाडौको बसुन्धरामा भएको मोटरसाइकल दुर्घटना हुदाँ नुवाकोटको बालकुमारी घर भएका नवराज रिजालको मृत्यु भएको छ ।


२५ वर्षका रिजालले चलाएको बा.६८ प ७४७८ नम्बरको मोटरसाइकल आफै अनियन्त्रित भएर विद्युतको पोलमा ठोक्किन पुग्दा गम्भीर घाइते भएपनि उपचारको क्रममा उनको मृत्यु भएको प्रहरीले जनाएको छ ।
दुर्घटनामा परी घाइते भएका रिजाललाई उपचारको लागी शिक्षण अस्पताल महाराजगंजमा पु¥याएको केही समयमा नै मृत्यु भएको प्रहरीले जनाएको छ ।