विवाद समाधानमा सामुदायिक मेलमिलापको भूमिका प्रभावकारी

Posted on: October 15, 2018 | views: 2707



नुवाकोट । समुदायमा उत्पन्न विवाद समाधानको लागी गाँउगाँउमा स्थापना भएका सामुदायिक मेलमिलाप केन्द्रको भूमिका प्रभावकारी हुदै आएको नुवाकोटमा विभिन्न स्थानीयतहमा रहेका न्यायिक समितिका पदाधिकारीले बताएका छन् ।


देवानी प्रकृतिका कानूनले मेलमिलाप गर्न सक्ने भनेर निर्धारण भएका विवाद समाधानको लागी क्रियाशिल रहेको प्राकृतिक श्रोत द्धन्द्ध रुपान्तरण केन्द्र, नेपालको आयोजनामा आइतबार लिखु गाँउपालिकाको वडा नं. ४ वडा कार्यालयमा आयोजित मेलमिलाप सम्बन्धि सरोकारावालाहरुको अनुभव आदान–प्रदान कार्यक्रममा सहभागीले साुमदायिक मेलमिलाप केन्द्रको भूमिका मार्फत विवाद समाधानमा महत्वपूर्ण योगदान पुगेको बताएका छन् ।


कार्यक्रममा लिखु गाँउपालिकाको उपाध्यक्ष एव्म न्यायिक समितिका संयोजक रोजिना राईले मेलमिलाप केन्द्रको भूमिका प्रभावकारी भएकाले यसलाई निरन्तर सञ्चालन र क्रियाशिल बनाउन सहयोगको प्रतिबद्धता जनाउनुभएको छ ।
उहाले सामुदायिक मेलमिलाप केन्द्रमा आबद्ध रहेका सामुदायिक मेलमिलापकर्ताको क्षमता अभिबृद्धि, कार्यालय स्थापना तथा मेलमिलापमा भूमिका अर्थपूर्ण बनाएर अघि बढ्ने बताउनुभएको छ ।



     ‘दिगो शान्तिको लागी उन्नत सम्बन्ध’ भन्ने मूख्य नाराको साथ २०७२ सालको भूकम्प पश्चात नुवाकोटमा कार्यरत रहेको प्राकृतिक श्रोत द्धन्द्ध रुपान्तरण केन्द्र, नेपाल मार्फत नुवाकोटका साविक सबै स्थानीयनिकायमा रहेका समुदायिक मेलमिलाप केन्द्रलाई अहिले वडा अन्तरगत रहने गरी सञ्चालन भइरहेको केन्द्रका जिल्ला संयोजक सिताराम पौडेलले जानकारी दिनुभएको छ ।


स्वय सेवकको रुपमा सेवा पु-याउदै आएका सामुदायिकम मेलमिलापकर्ताहरुले गाँउघरमा उत्पन्न स–साना विवाद एवम् बैमनस्थतालाई स्थानीयस्तरमा दुवै पक्षको जीत–जीत हुनेगरी समाधान गरी दिगो शान्ति स्थापनाको प्रयास जारी रहेको केन्द्र संयोजक पौडेलले बताउनुभएको छ ।
कार्यक्रममा जिल्लाको लिखु, तादी, पञ्चकन्याँ र दुप्चेश्वर गाउपालिकामा गठन भएका न्यायिक समितिका पदाधिकारी, प्रहरी युटिनका प्रतिनिधि, सामुदायिक मेलमिलाप केन्द्रका मेलमिलापकर्ताहरुको सहभागिता रहेको थियो ।