पाँच दिनपछि आयो बिजुली, जनजीवन सामान्य बन्दै

Posted on: August 28, 2018 | views: 4356

अशोक ढकाल
१२ भदौ, नुवाकोट । नेपाल विद्युत प्राधिकरण नुवाकोट वितरण शाखाको लापरबाहीको कारण बिहीबारदेखि अबरुद्ध भएको विद्युत सुचारु भएको छ ।


गएको बिहीबार बिहान लिखु गाउँपालिका वडा नं. १ ढिकुरेमा करेन्ट लागेर एक महिलाको मृत्यु र दुई घाईते भएपछि त्यसको मर्मत गर्न काटिएको लाइन पाँच दिनपछि सोमबार साँझदेखि सञ्चालनमा आएको प्राधिकरणले जनाएको छ । देवीघाटदेखि चौघडा जाने सबस्टेसन ३३ केभी लाइनमा परेर पैदल यात्री तुलसा अधिकारीको मृत्यु भएको थियो भने दुई जना अझै काठमाडौको ग्राण्डी अस्पतालमा उपचार गर्दै आइरहेका छन् ।


बिहीबारदेखि वितरण शाखाले विद्युत लाईन मर्मत सम्भार ढिलाई गरेपछि माथिल्लो भेग लिखु, तादी, शिवपुरी, पन्चकञ्या, दुप्चेश्वर र सूर्यगढी गाउँपालिका विद्युत सेवाबाट बिहिन हुदै आएका थिए । विद्युत सेवा नहुदाँ बत्ति बाल्न, सञ्चार माध्यम रेडियो, टिभी, मोबाइल सेवा सञ्चालन गर्नबाट स्थानीय बासिन्दा बञ्चित भएकोमा विद्युत सुचारु भएपछि कठिनाई भएको दैनिकी सहज हुदै आएको छ ।