गेर्खु खोलाको पुल बाढीले बगायो, रसुवा आवतजावत बन्द

Posted on: August 19, 2018 | views: 4594

३ भदौ, विदुर ।  पासाङल्हामु राजमार्ग अन्तरगत नुवाकोटको त्रिशूली–बेत्रवती खण्डको पक्किपुल गेर्खु खोलाले बगाएपछि गाडी बन्द भएको छ । पुल बगाएपछि नुवाकोटबाट रसुवा हुदै रसुवागढी–केरुङ जाने सवारीसाधन रोकिएका छन् ।
शनिबार राती आएको बाढीले विदुर नगरपालिकाको वडा नं. १ र वडा नं. १० जोड्ने पक्कि पुलको दुवै तर्फको पर्खालमा क्षति पु-याएर र दुई मध्ये एकवटा पिल्लर समेत बगाएपछि पुलबाट पैदल यात्रु समेत हिडन् सक्ने अबस्था नभएको नुवाकोट प्रहरी प्रमुख बसन्त बहादुर कुंवरले जानकारी दिनुभएको छ ।
बाढीले पुल पूर्ण रुपमा क्षति पु¥याएपछि ठप्प भएको गाडी सञ्चालन गर्न बैकल्पिक स्थानको खोजी गरी काम सुरु गर्न लागिएको डिभिजिन सडक कार्यालय नुवाकोटले जनाएको छ । अन्तराष्ट्रिय नाकाको रुपमा विस्तार भइरहेको गल्छी–त्रिशूली–मैलुङ–स्याफ्रुबेंसी–रसुवागढी सडक योजना अन्तरगत अहिले पुल बगाएको स्थानसँगै नयाँ पुल निर्माणको काम बल्ला सुरु भएकाले गाडी सञ्चालन गर्न बैकल्पिक स्थानको छनोट गर्न समेत समस्या देखिएको डिभिजन सडक कार्यालय नुवाकोटका प्रमुख निरज शाक्यले जानकारी दिनुभएको छ ।
सडक अबरुद्धहुदाँ चीनको केरुङ र रसुवाबाट नुवाकोटहुदै काठमाडौ आउने गाडीहरु सबै बेत्रवतीमा रोकिएका छन् । गाडी सञ्चालन प्रभावित हुदाँ केरुङबाट स्याऊ लगायतका फलफूल ल्याएका व्यवसायी चिन्तित बनेका छन् ।