नुवाकोट बस दुर्घटनाः एक जनाको मृत्यु, ५६ जनाको उपचार जारी

Posted on: August 15, 2018 | views: 6488

३० साउन, नुवाकोट । म्यागङ गाँउपालिका वडा नं. २ बुङताङबाट त्रिशुलीतर्फ आउदै गरेको बस विदुर नगरपालिका वडा नं. ९ लामाटारमा बुधबार दुर्घटना हुदाँ एक जनाको मृत्यु भएको छ भने ५६ जना घाइतेको उपचार जारी रहेको छ ।
बुङताङबाट त्रिशूली आउदै गरेको पासाङल्यामु यातायात सेवा समितिको बा.२ ख २८०४ नम्बरको बस लामाटारमा मिनीट्रकलाई बाटो दिने क्रममा दुर्घटना हुदाँ गम्भीर घाइते भएका मध्ये विदुर नगरपालिका वडा नं. ७ महादेवखर्कका मोतीमाँया तामाङको उपचारका क्रममा काठमाडौँमा मृत्यु भएको प्रहरीले जनाएको छ ।


५६वर्षका तामाङको जिल्ला अस्पताल त्रिशूलीमा उपचार हुन नसकेपछि थप उपचारको लागी हेलिकोप्टर मार्फत ग्राण्डी अस्पताल काठमाडौमा पु-याएको केही समयमै मृत्यु भएको नुवाकोट प्रहरी प्रमुख बसन्तबहादुर कुंवरले जानकारी दिनुभएको छ ।
दुर्घटनामा परी गम्भीर घाइते भएकाहरु घिसिङ तामाङ, वीरबहादुर विश्वकर्मा, पूर्ण लामा, होमबहादुर लामा, प्रेमसिंह तामाङ, उत्तम तामाङ, बिबामायाँ तामाङ र मंगली तामाङको काठमाडौ विभिन्न अस्पतालमा उपचार भइरहेको छ ।
प्रहरीको अनुसार बाँकी ४८ जना घाइतेको जिल्ला अस्पताल त्रिशूलीमा उपचार भइरहेको छ । घाइते भएका ४० जना पुरुष र १६ जना महिला अधिकांश बुङताङ, देउराली र साल्मेका स्थानीय बासिन्दा परेका छन् ।


त्रिशूलीबाट निर्माण सामाग्रि बोकेर भैरमकोट जान लागेको मिनीट्रकले लामाटारको उकालेमा बाटो नदिएपछि ‘साइड’ दिन पछि हटेको बस अघिबढ्ने क्रममा सडकको छेउ भासिएर दुर्घटना हुदाँ करिब ५० मिटर तल पुगेको प्रहरीले जनाएको छ ।


बुधबार बिहान ८ बजे बुङताङबाट त्रिशूलीतर्फ यात्रु लिएर आइरहेको बस त्रिशूलीबाट भैरमकोटतर्फ जान लागेको मिनीट्रकले बाटो नदिएपछि पछि हटेको बस अघि बढाउने क्रममा सडकको डिल भासिएर दुर्घटनामा परेको बसको धनी बुङताङका मानबहादुर तामाङले जानकारी दिनुभयो । कच्चि सडक र उकालो समेत रहेको भन्दै मिनीट्रकले पछि हट्न नमानेपछि यात्रुले भरिभराउ भएको बस पछि हटेर मिनीट्रकलाई अघि बढ्न दिएको थियो । मिनीट्रकलाई जान दिएपछि अघि बढ्न खोजेको बस सडकको डील भासिएर दुर्घटनामा परेको प्रत्यक्षदर्शी भगवती सुनारले बताइन् ।


यो पनि पढ्नुहोस् । नुवाकोटमा बस दुर्घटना, ५७ जना घाइते, आठ जनालाई काठमाडौ पठाइयो