विमानस्थलमा ट्राफिक जाम हुँदा आकाशमै घुम्छन् जहाज,आत्तिन्छन् यात्रु

Posted on: April 24, 2018 | views: 8131

काठमाडौं । त्रिभुवन अन्तर्राष्ट्रिय विमानस्थलको टर्मिनल भवन २८ वर्ष पुरानो भयो । २० वर्षसम्म नेपालको हवाई यातायातको चाप थेग्न सक्ने प्रक्षेपण गरिएको थियो । तर, ०४७ मा भवन बनेपछि त्यसपछिका सरकार न यसको विकल्प खोज्नतिर लागे, न विमानस्थलको विस्तारमा गम्भीर भए । त्यसैले एउटा मात्रै धावनमार्गको भरमा दैनिक चार सयभन्दा बढी उडान/अवतरण गर्दा विमानस्थल साँघुरो भएको छ ।
तथ्यांकअनुसार सन् २००२ पछि नेपालमा अन्तराष्ट्रिय  यात्रुको संख्या कहिल्यै पनि घट्दो क्रममा रहेको छैन ।  वैदेशिक रोजगारीमा जाने नेपालीको संख्या पनि यसमा मुख्य भूमिका छ । यसको कारण विमानस्थल यति व्यस्त बनेको छ कि एयर ट्राफिक जाम हुँदा  पालो नपाएर जहाज आकाशमै घुम्छन् भने यात्रु आतिन्छन् । आजको नयाँ पत्रिका दैनिकले खबर छापेको छ ।  


काठमाडौंको हवाई ट्राफिक चाप घटाउने उपाय खोजी गर्दै जाँदा काभ्रेको ठूलीचौरमा पटक–पटक सम्भाव्यता अध्ययन गरिएको छ । प्राधिकरणका पूर्वमहानिर्देशक रतीशचन्द्रलाल सुमनका अनुसार ठूलीचौरमा एटिआर ७२ क्षमतासम्मका जहाज अट्ने गरी आन्तरिक विमानस्थल बनाउन सक्ने सम्भावना अध्ययनले देखाएको थियो । तर, तत्कालीन सरकारहरूले यसमा चासो देखाएनन् ।

अहिले पनि विमानस्थलबाट आन्तरिक उडान सार्न सक्ने विकल्पका रूपमा ठूलीचौरलाई लिइएको छ । तर, अब विमानस्थल बनाउन थाल्ने हो भने पनि कम्तीमा दुई वर्ष लाग्छ । यो विषयमा अहिलेको सरकार पनि अस्पष्ट छ ।