पर्सामा एकबर्षमा २९ वटा मानवअधिकार उल्लंघनका घटना

Posted on: December 29, 2017 | views: 1136

विरगञ्ज ।

पर्सा जिल्लामा एक वर्षमा २९ वटा मानव अधिकार उलंघनका घटना भएको सार्वजनिक गरिएको छ । 

अनौपचारिक क्षेत्र सेवा केन्द्र इन्सेकले वीरगञ्जमा आज आयोजना गरेको वाषिर्क पूर्व समीक्षा गोष्ठीमा २९ वटा मानव अधिकार उलंघनका घटना पर्सामा घटेको सार्वजनिक गरिएको हो । 

मानवअधिकार वर्ष पुस्तक २०१८ को वार्षिक समिक्षा गोष्ठीमा इन्सेकका पर्सा प्रतिनिधि केसी लामिछानेले पर्सा जिल्लामा सन् २०१७ मा विभिन्न प्रकृतिका मानवअधिकार उलंघनका २९ घटना भएको जानकारी दिनुभयो । 

पर्सामा एक वर्षमा ६ वटा हत्याका घटना भएका छन् जसमा ४ जना महिला छन् । अधिकाशं महिलाहरुको हत्या परिवारका सदस्यहरुबाटै भएको देखिएको छ । 

त्यसैगरी १६ वर्ष मुनीका ४ जना किशोरी र बालिकालाई बलात्कारको प्रयास भएको छ भने १६ वर्ष भन्दा माथिका ६ जना युवती र महिलालाई बलात्कारको प्रयास भएको छ । जसमध्ये २ वटा घटनाका प्रतिवादीहरु अझै फरार रहेका छन् । 

त्यस्तै एक वर्षमै १६ वर्ष भन्दा मुनीका ३ जना किशोरी र बालिकाको तथा ५ जना १६ वर्ष भन्दा माथिका युवती तथा महिला बलात्कृत भएका छन् ।

१६ वर्ष भन्दा मुनिका किशोरी तथा बालिकालाई बलात्कार गर्ने एक प्रतिवादी फरार रहेको इन्सेक प्रतिवेदनमा उल्लेख छ । इन्सेकले सन् २०१७ को हाल सम्म मानव बेचविखनका २, कथित बोक्सी आरोपका २ र बाल विवाहका १ वटा मुद्धा दर्ता भएको जनाएको छ । 

पर्सामा बोक्सी आरोपमा प्रताडित हुने एक जना महिला अधिकारकै क्षेत्रमा क्रियाशिल महिला समेत  रहेको तथ्यांकमा उल्लेख गरिएको छ । पर्सा जिल्लामा कथित बोक्सीको आरोपमा अधिकारकर्मीलाई नै शारीरिक र मानसिक यातना दिने काम भएको समेत जनाइएको छ ।