हिंसात्मक तराई आन्दोलनको प्रतिवेदन सार्वजनिक गर्न माग गर्दै प्रदर्शन

Posted on: December 29, 2017 | views: 877

जनकपुरधाम ।

सर्वोच्च अदालतका पूर्व न्यायाधिश गिरीशचन्द्रलालको संयोजकत्वमा गठन गरिएको आयोगले सरकार समक्ष बुझाएको तेश्रोको मधेश आन्दोलन प्रतिवेदन सार्वजनिक गर्नका लागि माग गर्दै आज जनकपुरधाममा प्रदर्शन गरिएको छ ।

नेपाल सरकारले नै गठन गरेको सो प्रतिवेदन तत्काल सार्वजनिक गरेर पिडितलाई न्याय दिनका लागि माग गर्दै मधेश आन्दोलनका पिडितहरुको सञ्जालले जनकपुरधामको रामानन्द चौकवाट जुलुस प्रदर्शन गरेका छन् ।

मधेश आन्दोलनमा परेर पिडित भएकाहरुको सहभागितामा भएको सो जुलुस अस्पताल रोड, जानकी चौध, सुनचादी बजार भएर जनक चौकमा आएर सम्पन्न भएका थिए । आन्दोलनको क्रममा अहिले पनि विभिन्न मुद्दा खेपीरहेका युवाहरुको पनि सहभागिता रहेको थियो ।

जनक चौकमा आयोजना गरिएको कोण सभामा बोल्दै मधेश आन्दोलनका पिडित रहेका सरोज मिश्रले सरकारले नै गठन गरेको आयोगले बुझाएको प्रतिवेदन सार्वजनिक गरेर क्षतिपूर्ती, परिपूरण तथा न्याय दिनका माग गरेका थिए ।

यस अघि पनि शहिद परिवारले पनि विज्ञप्ति जारी गरेर मधेश आन्दोलनको क्रममा भएको घटनाहरुको बारेमा तयार पारिएको प्रतिवेदन सार्वजनिक गर्नका लागि पनि माग गर्नु भयो ।