सीता चरित्रमा आधारित हिन्दी भाषाको सीतायणको प्रकाशन

Posted on: October 29, 2017 | views: 284

जनकपुरधाम ।

सीता चरित्रमा आधारित हिन्दी भाषाको सीतायण नामक ग्रन्थको आज जनकपुरधाममा लोकार्पण गरिएको छ ।

नेपाल हिन्दी प्रतिष्ठान जनकपुर तथा भाष संगम ईलाहावादको आयोजनामा आज जनकपुरधाममा भएको सो कार्यक्रममा त्रिभुवन विश्वविद्यालय केन्द्रीय हिन्दी विभागका विभागाध्यक्ष डा. संजिता वर्मा, पूर्व विभागाध्यक्ष डा. सूर्यनाथ गोप, बरिष्ठ पत्रकार तथा नेपाल हिन्दी प्रतिष्ठानका अध्यक्ष राजेश्वर नेपाली, पुस्तकका प्रकाशक तथा टिकाकार डा गोविन्द राजन र विद्वान डा. रामचन्द्र रायले संयुक्त रुपमा सीतायणको लोकार्पण गर्नु भएको थियो ।

कूल ६ भाग तथा ९ सय ३३ पृष्ठको सीतायण पुस्तकमा सीताको जन्म देखि पृथवी समागमसम्मको अवस्थालाई निक्कै सहज तरिकाले समेटेर प्रकाशन गरिएको छ । यसमा माता सीताको वालकाण्ड, द्वितीय काण्ड, जयमालाकाण्ड, रसमाला काण्ड, सुखमालाकाण्ड र रसाल काण्ड रहेका छन् ।

सीतायणको दोहाको मूल लेखक रामप्रीया शरण भएपनि सो पुस्तकको संपादन गर्ने काम भाष संगम ईलाहावाद विद्वान डा. गोविन्द राजनले गर्नु भएको छ । पुस्तक निक्कै संग्रहणीय रहेको छ । पुस्तकको मूल्य भारतीय रकम ६ सय रहेको छ ।

कार्यक्रममा सहभागि भएका विद्वान वक्ताहरुले पुस्तकले माता सीताको आदर्श, सहनशीलता, त्याग, निष्ठा, पवित्रता जस्ता कुराहरु पुस्तकमा समेटेकाले यो सवैका लागि पठनीय भएको पनि बताउनु भएको थियो ।

नेपाल हिन्दी प्रतिष्ठान जनकपुरका अध्यक्ष प्रेस स्वतन्त्रता सेनानी राजेश्वर नेपालीको अध्यक्षतामा भएको सो कार्यक्रममा त्रिभुवन विश्वविद्यालय केन्द्रीय हिन्दी विभागका विभाध्यक्ष डा. संजिता वर्माले लेखेको गुरु दक्षिणा कथा संग्रहको पनि विमोचन गरिएको थियो । उक्त पुस्तक पनि भाषा संगम ईलाहावादले नै प्रकाशन गरेको छ ।

कार्यक्रममा बोल्दै वक्ताहरुले सीतायणको प्रकाशनले जनकपुरको चर्चा परिचर्चा भारत सहित सम्पूर्ण विश्वमा हुने र जनकपुरधामको धार्मिक पर्यटन प्रबद्र्धनमा पनि मद्दत पुग्ने विचार राख्नु भएको थियो ।

कार्यक्रममा विभिन्न हिन्दीका कविहरुले कविता पनि वाचन गरेका थिए । कार्यक्रममा केही विद्वानलाई सम्मान गर्ने काम पनि भएको थियो ।