२८ वर्ष पछि थिमिमा महाकाली नाच सुरु

Posted on: September 06, 2017 | views: 3079

भक्तपुर ।

मध्यपुरथिमिमा २८ वर्षपछि आजबाट महाकाली नाच सुरु भएको छ । हरेकवर्ष संचालन हुदै आएको यो नाच आर्थिक अभावका कारण २८ वर्षदेखि बन्द भएको थियो ।


मध्यपुरथिमि नगरपालिका वडा नं. ५ र ६ का युवा मिलन केन्द्रका युवाहरुको सक्रियतामा महाकाली नाच संरक्षण समिति गठन गरेर आजबाट सुरु भएको हो । 


समितिका अध्यक्ष सूर्यमान श्रेष्ठले आजबाट चारदिनसम्म टोलटोलमा नचाएर मनाईने बताउँदै उहाँले नाच साँझ ६ बजेपछि नित्यनाथलाई समर्पित गर्दै टोलटोलमा नचाईने बताउनुभयो । 


अध्यक्ष श्रेष्ठका अनुसार मध्यपुरथिमि ५ भुँलाखेल स्थित नित्यनाथ मन्दिरमा पूजा गरेर नाचलाई समर्पित गरी सुरु हुनेछ र नाच्दै बालकुमारी मन्दिर अगाडि पुगेपछि नाचिन्छ । 


नाचका गुरु हरिबहादुर कैती श्रेष्ठले आदिमकालदेखि  नै देवासुर संग्राममा आधारित रहेर असुरलाई पराजित गरेपछिको विजयोत्सवका रुपमा यो नाच सातदेखि नौ तालमा नाचिने बताउनुभयो । 


मध्यपुरथिमि नगरपालिकाका नगरप्रमुख मदनसुन्दर श्रेष्ठले नगरको मौलिक परम्परा, ऐतिहासिक एवं साँस्कृतिक परम्परा, पर्व एवं नाच लगायतका धरोहरको संरक्षणका लागि नगरपालिकाले बजेट विनियोजन गरेको बताउनुभयो ।