'अरुले जिते गणतन्त्र खतरामा पर्छ, बाली माओवादीले लगाएको हो फल पनि खान पाउनुपर्छ'-दाहाल

Posted on: June 22, 2017 | views: 241

नेपालगञ्ज ।

पूर्व प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहालले अहिलेसम्म प्राप्त उपलब्धि र परिवर्तनलाई संस्थागत गर्न माओवादीलाई बलियो बनाउन आग्रह गरेका छन् ।


बाँकेको खजुरामा आज आयोजित चुनावी सभालाई सम्बोधन गर्दै दाहालले माओवादी बलियो हुँदा मात्र परिवर्तन संस्थागत हुने जिकिर गर्दै स्थानीय चुनावमा माओवादीलाई जिताउन आग्रह गरे ।


अन्य पार्टी विजयी भए गणतन्त्र खतरामा पर्ने दाहालको दाबी छ । गणतन्त्रको बाली माओवादीले लगाएको भन्दै त्यसको फल माओवादी र जनताले पाउनुपर्ने दाहालको कर्त थियो ।


दाहलले आफ्नो नेतृत्वको सरकारले १० महिनामा लोडसेडिङ अन्त्य गर्नुका साथै आर्थिक वृद्धिदर हासिल गरेर देखाएको बताए । संविधान कार्यान्वयनको पहिलो खुट्किलो स्थानीय तहको निर्वाचन भएकाले सबै मिलेर यसलाई सफल बनाउनुपर्ने धारणा राखे ।


आगामी माघ ७ भित्र गरिसक्नुपर्ने प्रदेश र संघको निर्वाचनका लागि पनि यसले माहोल निर्माण गरेको दाहालको भनाई छ ।