‘हिन्दु राष्ट र राजसँस्था पुर्नबहाली गर्न राप्रपा राष्ट्रवादी’

Posted on: April 21, 2017 | views: 381

७ बेशाख, विदुर । एकीकृत राष्ट्रिय प्रजातन्त्र पार्टी राष्ट्रवादीका अध्यक्ष डा.प्रकाशचन्द्र लोहनीले मुलुकलाई हिन्दु राष्ट्र र राजसँस्थाको पुनःस्थापनाको लागी नयाँ पार्टी गठन गर्नुपरेको बताउनुभएको छ ।


एकीकृत राप्रपा राष्ट्रवादी नुवाकोटको आयोजनामा बिहीबार बिदुरमा भएको बृहत्त जिल्लास्तरीय कार्यकर्ता भेलालाई सम्बोधन गर्दै अध्यक्ष लोहनीले संसारभर एक अर्ब ३० करोड बासिन्दा हिन्दु धर्मालम्वी भएकाले त्यसको पहिचान हिमालय पर्वत रहेको नेपालबाट दिन हिन्दु राष्ट्र पुनःस्थापना अनिवार्य रहेको बताउनुभयो । “आफ्नो पार्टी सबै धर्मको सम्मान गरी ९४ प्रतिशत ओमकार परिवार रहेको हिन्दु धर्मालम्वी रहेको नेपाली भूमीलाई हिन्दु राष्ट्र घोषणाको लागी अभियान र दबाब चलाउछ ।” लोहनीने भन्नुभयो “मन्दिरहरुको शहर, गौतम बुद्धले बुद्धत्व प्राप्त गरेको भूमीमा धर्मको व्यापार बन्द गराउन मुलुक हिन्दु राष्ट्र हुनुपर्छ ।”


पार्टी एकतापछि राप्रपाबाट असन्तुष्टी भएर नयाँ पार्टी स्थापना गर्नुभएका लोहनीले हिन्दु धर्मसगै पार्टीले राजसँस्थाको पुनःस्थापनाको एजेण्डा अघि सारेको बताउनुभयो । “मुलुकमा जाती, धर्म, भूगोल, भाषा सबै क्षत्रेमा अविस्वास र बिखण्डनको ठूलो खतरा रहेकाले त्यसको समन्वय गर्न विघठित राजसँस्थाको पुर्नबहाली हुनुपर्छ ।” उहाँले भन्नुभयो “ लाकेतन्त्रको लागी राजसँस्था समस्या हुदैन, यसलाई संबिधानको परिधिमा राख्नुुपर्छ ।”


कार्यक्रममा पार्टीका बरिष्ठ नेता केशरबहादुर विष्ट, सचिवालय प्रमुख भरतजंग उप्रेती, संगठन विभाग प्रमुख तारानाथ लुइटेल, केन्द्रीय सदस्यहरु सुष्मा शर्मा, माधव भण्डारी, नानीमैयाँ आचार्य, श्यामुकमार केसी, जिल्ला संयोजक झनक प्याकुरेल लगायतले नयाँ शक्तिको रुपमा उदाएको पार्टीलाई भ्रष्ट्राचार मुक्त समाजको स्थापना र विकासप्रेमी पार्टीको रुपमा संगठन विस्तारमा लाग्न कार्यकर्तालाई आग्रह गरे ।

नयाँ पार्टीको रुपमा रहेको एकीकृत राप्रपा राष्ट्रवादीले स्थानीयतहको निर्वाचनमा चुनाव चिन्ह हलो नपाएपनि स्वतन्त्र रुपमा प्रतिस्पर्धा गर्ने जनाएको छ ।