'हत्यारा' ढुंगेलको मुद्दा फिर्ता लिन बैद्यको माग

Posted on: April 15, 2017 | views: 347

काठमाडौं ।

मोहन बैद्य नेतृत्वको माओवादीले हत्यारा ठहर माओवादी पूर्व सांसद बालकृष्ण ढुंगेलको मुद्दा फिर्ता लिनुपर्ने माग गरेको छ ।


सर्वोच्च अदालतले यसअघिनै सर्वस्व सहित जन्मकैदको फैसला सुनाउँदा समेत माओवादी पार्टी र नेताहरुको संरक्षणमा जोगिंदै आएका बालकृष्ण ढुंगेललाई दुईदिनअघि सर्वोच्च अदालतले ७ दिनभित्र पक्राउ गर्न आदेश दिएपछि बैद्य माओवादीको यस्तो प्रतिक्रिया आएको हो ।


बैद्यले सर्वोच्च अदालतद्धारा ढुंगेललाई ७ दिने पक्राउ पुर्जी जारी गरेकोमा गम्भीर ध्यानाकर्षण भएको बताएका छन् ।


विज्ञप्तिमार्फत वैद्यले माओवादीले जनयुद्धकालीन मुद्दा समाधान गर्न दुईवटा आयोग बनिसकेको भन्दै राज्यको तर्फबाट जनयुद्धकालिन मुद्दा तत्काल फिर्ता लिनुपर्ने तर्क अघि सारेको छ ।


वैद्यको नै हस्ताक्षर रहेको विज्ञप्तिमा जनयुद्धको नेतृत्वको एउटा हिस्सा सरकारमा रहनु र जनयुद्धमा संलग्न भएका कार्यकर्ता उत्पीडित बन्नु गम्भीर चिन्ताको विषय भएको जिकिर गरिएको छ ।


ओखलढुंगाका उज्जनकुमार श्रेष्ठको हत्यामा संलग्न रहेको प्रमाणित भएपछि सर्वोच्च अदालतले ढुंगेललाई दोषि ठहर गर्दै जेल सजाय सुनाएको छ । 


तर अदालतलाई नै चुनौती दिँदै ढुंगेल खुल्लम खुल्ला हिँड्ने गरेका छन् । उनले अदालतको अवहेलना गरेको भन्दै परेको अर्को मुद्दामा सर्वोच्चले बिहीबार सुनुवाई गर्दै ढुंगेललाई ७ दिन भित्र पक्रन प्रहरीलाई निर्देशन दिएको थियो ।


तर अदालतले आदेश दिएपनि सरकारको नेतृत्व गरिरहेको माओवादी केन्द्रका अध्यक्ष तथा प्रधानमन्त्री पुष्पकमल दाहालले भने अटेर गर्दै ढुंगेललाई अझैसम्म पक्राउ गर्न दिएका छैनन् । प्रहरी उच्च श्रोतका अनुसार तत्काल ढुंगेललाई पक्राउ नगर्न प्रहरीलाई भनिएको छ ।