काठमाडौंको मेयरमा पूर्व सचिव तथा बागमती सरसफाई अभियन्ता किशोर थापाको उमेदवारी

Posted on: April 14, 2017 | views: 693
काठमाडौंको मेयरमा पूर्व सचिव तथा बागमती सरसफाई अभियन्ता किशोर थापाको उमेदवारी 

काठमाडौं ।
नेपाल सरकारका पूर्व सचिव तथा बागमती सफाई अभियानका अग्रणी व्यक्तित्व किशोर थापाले काठमाडौं महानगरपालिकाको मेयरका लागि स्वतन्त्र उमेदवारी दिने घोषणा गरेका छन् ।

रबिन्द्र मिश्र नेतृत्वको साझा पार्टीका केन्द्रीय संयोजन समितिका सदस्य समेत रहेका थापा स्वच्छ छविका नेपाल सरकारका कर्मचारीका रुपमा परिचित छन् ।

साझा पार्टीले आफ्ना मूल्य(मान्यता तथा आदर्शलाई आत्मसात र प्रवर्द्धन गर्ने स्वतन्त्र उमेदवारलाई पार्टीले समर्थन गर्ने बताइरहँदा थापाको उमेद्वारी घोषणा भएको हो ।

इमान, जमान, क्षमता र सदाचारमा कहलिएका सक्षम पूर्व सचिवले नै देशकै राजधानीको मेयरका लागि साझा पार्टीको समर्थनमा स्वतन्त्र उमेदवारी दिने घोषणाले एकाएक चर्चा पाएको छ । काठमाडौंमा ठूला मानिएका काँग्रेस, एमाले र माओवादी पार्टीले उमेद्वार समेत छान्न नसकिरहेको बेलामा उनिहरुका लागि किशोर थापाको उमेद्वारी कडा प्रतिस्पर्धी बन्ने निश्चित देखिन्छ ।

आर्किटेक्ट इन्जिनियर थापाले शहरी विकास, शिक्षा र पर्यटन तथा नागरिक उड्डयन जस्ता महत्त्वपूर्ण मन्त्रालयहरूमा सफलतापूर्व सचिवको जिम्मेवारी सम्हालिसक्नुभएको छ ।

निष्कलङ्क छविका साथ अवकाश लिएका थापा काठमाडौंको सडक विस्तार गर्ने तथा दशकौंदेखि अवरूद्ध रहेको मेलम्ची खानेपानी आयोजनालाई तीव्रता दिने काममा महत्वपूर्ण भूमिका खेल्ने नेपाल सरकारका सचिव समेत हुन् ।

नेपालको बिस वर्षे ऊर्जा विकास योजना तथा बाहिरी चक्रपथ र अन्य कयौँ महत्त्वपूर्ण आयोजनाको नेतृत्व किशोर थापाकै कार्यमा नेपाल सरकारले गरेको थियो ।

शहरी योजनाका स्नातकोत्तर थापा केही समयअघिसम्म म्यानमारको राष्ट्रिय आवास नीति निर्माणमा अन्तर्राष्ट्रिय विज्ञका रूपमा समेत कार्यरत थिए ।

सङ्घीयता अन्तरगत स्थानीय तहमा उल्लेख्य अधिकार रहेको सन्दर्भमा काठमाडौं महानगरको मेयरमा निर्वाचीत भएमा थापाले आफ्ना अनुभव, योग्यत र क्षमताले काठमाडौं महानगरपालिकालाई साँच्चैको महानगर बन्न लायक काम गर्ने प्रतिवद्धता व्यक्त गरेका छन् ।

थापाले राजधानीको निरन्तर खस्किंदो अवस्थालाई सुधार गरी संमृद्ध, गतिशील, सुन्दर, सुविधाजनक र स्वच्छ महानगर निर्माणका लागि आफुले काम गर्ने प्रतिवद्धता जनाएका छन् ।

साझा पार्टी नेपालले अबको मेयरको नेतृत्वले शहरी योजना र व्यवस्थापनका विविध क्षेत्रमा लिने निर्णयले यहाँका वासिन्दाको जीवनको गुणस्तर र काठमाडौं महानगरको भविष्य निर्धारण गर्ने भएकाले यो वास्तविकतालाई मनन गर्दै काठमाडौं महानगरपालिकाको मेयरका लागि किशोर थापा जस्तो सक्षम र उपयुक्त उमेदवारलाई मत दिन आग्रह समेत गरेको छ ।

काठमाडौं महानगरपालिकाका लागि थापाको कार्य योजना तथा उनको सहयोगीका रूपमा उपमेयरका लागि उमेदवारी थापाले छिटै सार्वजनिक गर्ने बताइएको छ ।

थापाको उमेदवारीको समर्थनका लागि साझा पार्टी काठमाडौंले महानगरवासीमा हार्दिक अपील समेत गरेको छ ।


को हुन् किशोर थापा ?



किशोर थापा २०१६ सालमा काठमाडौंको चोभारमा जन्मिएका हुन् ।
२०३१ सालको एसएलसी परीक्षामा प्रथम श्रेणीमा प्रथम भएका थापाले ल्याबोरेटरी स्कूल कीर्तिपुरबाट एसएलसी गरेका हुन्  ।

उनले कलकत्ता विश्वविद्यालयबाट आर्किटेक्चरमा स्नातक र दिल्लीको स्कूल अफ प्लानिङ एण्ड आर्किटेक्चरबाट शहरी योजनामा स्नातकोत्तर गरेका छन् ।

उनले हम्फ्रे फेलोशीप कार्यक्रमअन्तर्गत अमेरिकाको रर्टगर्श विश्वविद्यालयमा आवास र शहरी योजनामा शोधकार्यका लागि छात्रवृत्ति पाएका थिए ।  

२०३९ सालबाट सरकारी सेवामा प्रवेश गरेका उनले शहरी विकास योजना तथा भवन निर्माण विभागको महानिर्देशक, भौतिक योजना तथा निर्माण मन्त्रालयमा सहसचिव, जलशक्ति आयोगको कायममुकायम सचिव हुँदै सचिव र पर्यटन तथा नागरिक उड्डयन मन्त्रालयको सचिवलगायतको जिम्मेवारी वहन गरिसकेका थापाले  निर्वाचन आयोगमा सचिवको रुपमा समेत सफल कार्यभार सम्हालेका थिए ।