दुईजिब्रे काँग्रेस ! निर्वाचन एकै चरणमा-पार्टी, उपप्रधानमन्त्री निधि भन्छन्-'दुई चरणमा हुन सक्छ'

Posted on: April 07, 2017 | views: 237

काठमाडौं ।

नेपाली काँग्रेस पार्टीले एकै चरणमा निर्वाचन हुनुपर्ने बताएकै दिन उही पार्टीका उपप्रधानमन्त्री समेत रहेका नेता बिमलेन्द्र निधिले भने दुई चरणमा पनि हुनसक्ने बताएका छन् ।


स्थानीय तहको निर्वाचनमा पार्टीको तयारी र घोषणापत्रका बारेमा सुझाव लिन आज काठमाण्डौमा आयोजित पार्टीे केन्द्रीय समिति र संसदीय दलको संयुक्त बैठकमा नेताहरुले निर्वाचन तोकिएकै मितिमा हुनुपर्ने धारणा राखे ।


बैठकमा अधिकांश केन्द्रीय सदस्य र सांसदले मुलुकमा निर्वाचन हुन नदिने योजनाका साथ दुई चरणमा निर्वाचन गर्ने कुरा चर्चामा ल्याइएकाले निर्वाचन एकै चरणमा र तोकिएकै मितिमै हुनुपर्ने धारणा राखेका थिए ।


बैठकमा नेताहरुले निर्वाचनको सम्पूर्ण तयारी भइरहेका बेला दुई चरणमा निर्वाचन हुनुपर्छ भन्ने कुरा आउनु सत्ता लम्ब्याउने मनशायका साथ आएको बताए ।


उपप्रधानमन्त्रीको वरियताको विषय सार्वजनिक भई चर्चामा आउँदा जनतामाझ नकारात्मक सन्देश गएको भन्दै केन्द्रीय सदस्यहरुले पार्टीको नेतृत्व तहबाटै विवाद समाधान गर्नुपर्ने सुझाव दिएका थिए ।


बैठकमा पार्टी सभापति शेरबहादुर देउवा र वरिष्ठ नेता रामचन्द्र पौडेलले तोकिएको मितिमा निर्वाचन हुनेमा शंका नगर्न सबै नेता, कार्यकर्तालाई आग्रह गर्दै एक ढिक्का भएर निर्वाचनमा होमिन निर्देशन दिए ।


जनताको अपेक्षाअनुसार काम हुन नसकेको भन्दै बैठकमा पार्टीबाट प्रतिनिधित्व गर्ने मन्त्रीको आलोचनासमेत भएको थियो । 


पार्टीले बैठकमा उठेका सबै सुझाव घोषणापत्र तयारी समितिमा पठाउने र तराई–मधेसका मागलाई सम्बोधन गर्न अधिकतम सहमतिका साथ संशोधन प्रक्रिया अघि बढाउने निर्णय गरेको छ । 


काँग्रेसले स्थानीय तहका लागि संक्षिप्त घोषणापत्र आगामी वैशाख पहिलो साताभित्र तयार हुने जनाएको छ । 


उता उपप्रधान एवम् गृहमन्त्री विमलेन्द्र निधिले भने मधेशी मोर्चा निर्वाचनमा सहभागी हुने निश्चित भए दुई चरणमा निर्वाचन गर्न सकिने वताएका छन् ।


विराटनगरमा आयोजित क्षेत्रीय सुरक्षा गोष्ठी पछि पत्रकार सम्मेलनमा उपप्रधानमन्त्री निधिले मधेशी मोर्चा पनि निर्वाचनमा भाग लिन तयार भए दुइ चरणमा निर्वाचन गराउन सकिने बताएका हुन् ।


उपप्रधानमन्त्री निधिले वैशाख–३१ गते हुन लागेको स्थानीय तहको  निर्वाचनलाई भयरहित एंव शान्तिपूर्ण रुपले सम्पन्न गर्न आवश्यक सुरक्षा रणनीति तयार पारिएको बताए ।


उपप्रधानमन्त्री निधिले स्थानीय मतदाता, उमेदवार, निर्वाचनमा खटिने कर्मचारीको सुरक्षा र साधारण जनताको सुरक्षालाई  व्यवस्थित गरिएकाले निर्वाध रुपमा निर्वाचनमा सहभागी हुन सबैलाई आग्रह समेत गरे ।

पुर्वाञ्चलका १६ वटै जिल्लाका प्रमुख जिल्ला अधिकारी, नेपाल प्रहरी, सशस्त्र प्रहरी, नेपाली सेना तथा राष्ट्रिय अनुसन्धान प्रहरीका प्रमुखहरुको सहभागिता रहेको गोष्ठीमा निष्पक्ष एवम् भयरहित वातावरणमा कसरी निर्वाचन सम्पन्न गर्न सकिन्छ भन्ने विषयमा छलफल भएको थियो ।