सत्ता घटक, प्रतिपक्षी र तराई केन्द्रित दलको वार्ता, नेताहरु भन्छन्-'हार्दिकतामा छलफल भयो'

Posted on: March 23, 2017 | views: 110

काठमाडौं ।
लामो समयको अन्तरालपछि आज पहिलो पटक सत्तारुढ, प्रमुख प्रतिपक्षी दल तथा आन्दोलनरत संयुक्त लोकतान्त्रिक मधेशी मोर्चाबीच मुलुकको समसामयिक परिस्थितिबारे छलफल भएको छ ।

प्रधानमन्त्री निवास बालुवाटारमा साँझ भएको संयुक्त वैठकमा हार्दिकता र सौहार्दपूर्ण कुराकानी भएको छलफलमा सहभागी नेताहरुले प्रतिक्रिया दिनुभएको छ ।

खासगरी नजिकिएको स्थानीय तहको निर्वाचनलाई सफलतापूर्वक सम्पन्न गर्ने र त्यसमा सबै पक्षलाई सहभागी गराउने विषयमा सकारात्मक छलफल भएको थियो ।

वैठकबारे सञ्चारकर्मीलाई जानकारी दिँदै नेकपा एमालेका नेता सुवासचन्द्र नेम्वाङले पहिलो पटक सत्तापक्ष, प्रतिपक्षीसहित मोर्चासँग एकै ठाउँमा बसेर हार्दिकतापूर्वक छलफल भएको बताउनुभयो ।

यो छलफललाई निरन्तरर्ता दिई निस्कर्षमा पुर्याउने समझदारी भएको र प्रधानमन्त्रीको चीन भ्रमणपछि थप छलफल गरि निचोड निकाल्ने समझदारी भएको उहाँले उल्लेख गर्नुभयो ।

“हामी के निष्कर्षमा पुगेका छौ भने यो छलफललाई निष्कर्षमा पुर्याउन निरन्तर वैठक गर्ने, आज प्रधानमन्त्रीको चीन भ्रमण भएकाले सकेसम्म त्यसअघिनै टुङ्गोमा पुग्ने भनिएको थियो तर सकिएन अब सकारात्मक ढङ्गले अघि बढ्छौ,”–नेता नेम्वाङले भन्नुभयो ।