सप्तरीमा हाम्रो सामुहीक हत्या प्रयास असफल पारिदिंदा प्रहरीलाई सरकारले कारवाही गर्यो-ओली

Posted on: March 10, 2017 | views: 709

हेटौंडा ।
नेकपा एमालेका अध्यक्ष केपी शर्मा ओलीले सप्तरीमा एमाले नेतृत्वको सामुहिक हत्या प्रयास गरेको बताएका छन् ।

पूर्व प्रधानमन्त्री समेत रहेका ओलीले आफुहरुको हत्या प्रयास प्रहरीले असफल पारिदिंदा सरकारले उनिहरुमाथि कारवाही गरेको बताएका छन् ।

हैटौंडाबाट पुनः शुरु भएको एमाले अभियानलाई भुटनदेवी उच्च माविको प्रांगणमा शुक्रबार सम्बोधन गदै ओलीले आफुहरु मरेपनि अभियान नरोकिने प्रतिवद्धता जनाए ।

ओलीले मुलुकलाई चुनाव र सामाजिक सदभावमा जोड्न थालिएको अभियान जस्तासुकै घटनाले पनि नरोकिने दावी गरे ।

ओलीले भने, ‘सप्तरीमै हाम्रो सामुहिक हत्या गर्ने सुनियोजित प्रयास थियो भन्ने सरकारले स्वीकार गरिसकेको छ । सुरक्षाकर्मीले अत्यन्त विवेक प्रयोग गरेर ठूलो क्षति हुनबाट रोके । तर अहिले पनि हामीलाई सिध्याउने षडयन्त्र जारी भए पनि एमालेको यो अभियान म सहित हाम्रो सिंगो टिम सिध्याए पनि रोकिने छैन ।’

एमालेको नेतृत्व गर्न सक्षम एकपछि अर्को टिम तयार भइसकेको भन्दै ओलीले आपराधिक तत्वको धम्की र अवरोधबाट एमाले नडराउने बताए ।

सभालाई सम्बोधन गर्दै एमाले महासचिव इश्वर पोखरेलले एमालेको शीर्ष नेतृत्वको सामुहिक हत्या गर्ने प्रयास असफल पार्ने सुरक्षाकर्मीलाई सरकारले सजाय दिएको भन्दै सरकारको आलोचना गरे ।

उनले घरेलु हतियार र बम बोकेर एमालेका नेताहरुको हत्या गर्न आएकाहरुको बारेमा सरकार पनि जानकार रहेको उनको दावी थियो ।

सप्तरी घटनापछि तीन दिन स्थगन भएको एमालेको अभियान शुक्रवार हेटौंडाबाट पुनः शुरु भएको हो ।

एमालेले यही फागुन २१ गतेदेखि झापाबाट मेची(महाकाली अभियान सुरु गरेको थियो । गत सोमबार सप्तरी घटनापछि अभियानलाई तीन दिन स्थगित गरिएको थियो ।

सप्तरीमा एमालेको कार्यक्रम विथोल्न घरेलु हतियार सहित प्रदर्शनमा आएका मधेशी मोर्चाका उग्र चार कार्यकर्ता प्रहरी कारवाहीमा मारिएका थिए ।