कञ्चनपुर घटनालाई लिएर भारतीय मिडियामा भ्रामक समाचार, नेपाल प्रहरी माथी नै गम्भिर आरोप

Posted on: March 10, 2017 | views: 884

कञ्चनपुर, २७ फागुन, काठमाडौं । कंचनपुरको आनन्द बजार नजिक नेपाल भारत सिमा क्षेत्रमा बिहीवार भारतीय सिमा सुरक्षा फौज एसएसबीले गोली चलाउदा एक नेपालीको ज्यान गयो । एसएसबीको यो ज्यादतीको विरुद्ध अहिले पुरै देश आक्रोशित छ । कंचनपुरमा हिजो दिन भर जसो नेपालीहरुले प्रदर्शन गरे । आज त्यस क्षेत्रमा विहानै देखि प्रदर्शन भइरहेको छ । तर आजै केही भारतीय मिडियाले भने भ्रामक समाचार प्रकाशन गरेका छन् । गोली लागेर नेपालीको ज्यान गएको विषयलाई कतै उल्लेख नगरी भारतीय मिडियाले नेपाली नागरिक र नेपाली सुरक्षाकर्मी माथी नै गम्भिर आरोप लगाएका छन् । नेपाली पक्षले पुल निर्माण गरिरहेको क्षेत्रलाई विवादीत भुमी भनिएको छ । नेपाली पक्षलाई सम्झाउन पुगेका एसएसबीका अधिकारी र जवाव माथी नेपाली नागरिकले एक्कासी ढुंगा बर्साएको समाचारमा लेखिएको छ । प्रदर्शनमा नेपाली सुरक्षाकर्मीले पनि साथ दिएको र कम्तिमा ५० जना एसएसबीका जवान घाइते भएको दावी गरिएको छ । यस्तै नेपाल पक्षले भारतको सिमा तर्फ ५ सय मिटर भित्र छिरेर नेपाली झण्डा गाडेको समेत आरोप भारतीय मिडियाले लगाएका छन् ।