माओवादीका विद्यार्थी संगठन पछाडी नेताको टाउको जोडियो

Posted on: February 21, 2017 | views: 313

काठमाडौं ।
विद्यार्थी हकहितमा खोलिएपनि दलका एजेण्डा बढी बोक्ने गरेका सबैजसो विद्यार्थी संगठनहरु पछिल्लो समय बदनाम छन् ।

आसन्न स्वतन्त्र विद्यार्थी युनियन चुनावमा दलिय आधारमा चुनावमा जुटिरहेका विद्यार्थी संगठन मध्ये माओवादीका नेता पिच्छेका दलहले गर्दा उनिहरुका विद्यार्थी संगठनलाई झनै सकस हुने देखिएको छ ।

पुष्पकमल दाहाल, मोहन बैद्य, नेत्र विक्रम चन्द पार्टीका तीनवटा विद्यार्थी समूहले आसन्न स्ववियु चुनावमा यिनै नेताको नाम पछाडि राख्ने भएका छन् ।

तीनवटा अखिल क्रान्तिकारीको नामका पछाडि प्रचण्ड, मोहन वैद्य र विप्लवको नाम जोड्ने सहमति भएको हो ।

तीन दलका क्रान्तिकारी विद्यार्थी संगठनहरुको नाम एउटै छ -अखिल 'क्रान्तिकारी' । प्रचण्ड नेतृत्वको माओवादी केन्द्र, मोहन वैद्य नेतृत्वको क्रान्तिकारी कम्युनिष्ट पार्टी र विप्लव नेतृत्वको नेपाल कम्युनिष्ट पार्टीले आ-आफ्ना विद्यार्थी संगठनहरुको नाम एउटै राखेका छन् ।

नाम र झण्डासमेत एउटै भएकाले आसन्न स्ववियु चुनावमा एक अर्को संगठनलाई चिन्नै नसकिने समस्या आएपछि स्ववियु निर्वाचनको संघारमा यी संगठनहरुले आफूलाई अलग-अलग तरिकाले चिनाउने नयाँ जुक्ति निकालेका हुन् ।

त्रिभुवन विश्वविद्यालयका पदाधिकारीहरु समेतको सहभागितामा बसेको अखिल 'क्रान्तिकारी'का नेताहरुको संयुक्त बैठकले संगठनको नामको पछाडि माउ पार्टीका अध्यक्षको नाम लेख्ने सहमति गरेका छन् ।

अब स्ववियु चुनाव अवधिभर माओवादी केन्द्र निकट विद्यार्थी संगठनको नाम अखिल 'क्रान्तिकारी' ‘प्रचण्ड’ रहनेछ ।

यसैगरी क्रान्तिकारी कम्युनिष्ट पार्टी निकट अखिल 'क्रान्तिकारी'को नाम अखिल 'क्रान्तिकारी' ‘मोहन वैद्य’ रहने छ भने नेपाल कम्युनिष्ट पार्टी निकटसंगठनको नाम अखिल 'क्रान्तिकारी' ‘विप्लव’ लेखिने भएको छ ।

त्रिभुवन विश्वविद्यालयकी शिक्षाध्यक्ष सुधा त्रिपाठी, कार्यवाहक निर्देशक गंगाबहादुर मगरका साथै अखिल क्रान्तिकारीका नेताहरु दिपेन्द्र चलाउने, विष्णु नेम्वाङ र रामचन्द्र अधिकारीका संयुक्त बैठकले यस्तो सहमति गरेको बैठकपछि जारी संयुक्त विज्ञप्तिमा उल्लेख छ ।