६७ औ प्रजातन्त्र दिवसमा सेनाको प्रदर्शन र नेताको भाषण

Posted on: February 18, 2017 | views: 266

काठमाडौं ।
यस बर्षको ६७ औं राष्ट्रिय प्रजातन्त्र दिवस समग्रमा अघिल्ला बर्षहरुको भन्दा खासै तात्विक फरक रहेन ।

आज पनि विगतका वर्षहरुमा जस्तै देशभर विभिन्न कार्यक्रमको आयोजना गरी मनाइएको छ । दिवसका  अवसरमा आज विहान काठमाडौंको सैनिक मञ्च टुडिखेलमा विशेष समारोहको आयोजना गरियो ।

समारोहमा प्रधानमन्त्री पुष्पकमल दाहालले संविधानलाई संर्वस्वीकार्य बनाउँदै कार्यान्वयन गर्नु अहिलेको प्रमुख चुनौती भएको बताए ।

प्रधानमन्त्रीले संविधान कार्यन्वयनको लागि निर्वाचन अनिवार्य रहेकाले निर्वाचन सम्पन्न गर्न सरकार लागि परेको बताए ।

प्रधानमन्त्री दाहालले संघीयता सहितको संविधानको कार्यन्वयन एवं समानुपातिक समावेशिता, धर्मनिरपेक्षता सहितको परिवर्तन संस्थागत गर्न सहयोग गर्न सवै पक्षलाई आग्रह गरे ।

प्रधानमन्त्रीले शासन व्यवस्थालाई जवाफदेही बनाई आर्थिक सवृद्धि र जनताको पहुँच राज्यसम्म पुग्ने व्यवस्था गर्न लोकतन्त्रको सुदृढीकरण र संविधान कार्यन्वयन हुनु पर्नेमा जोड दिए ।

समारोहमा राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधान न्यायाधीश सुशीला कार्की, सभामुख ओनसरी घर्ती, उपप्रधानमन्त्रीहरु, मन्त्रीहरु, उच्चपदस्थ अधिकारीहरु र सुरक्षा निकायका प्रमुखहरु र कुटनीतिक नियोगका अधिकारीहरुको उपस्थिति रहेको थियो ।

समारोहमा नेपाली सेनाको हेलिकप्टरबाट पुष्पवृष्टिका साथै नेपाली सेना, नेपाल प्रहरी, शशस्त्र प्रहरी, नेपाल स्काउट लगायतले मार्च पास गरेका थिए ।

यसैगरी समारोहमा विभिन्न भेषभुषा, भाषा, संस्कृति झल्कने झाँकी प्रस्तुतीको साथै राष्ट्रिय खेलकुद परिषद्बाट विभिन्न खेलको प्रदर्शन समेत गरिएको थियो ।

प्रजातन्त्र दिवसको अवसरमा आज ७५ वटै जिल्लामा जिल्ला समारोह समितिको अगुवाईमा विभिन्न कार्यक्रम गरिएको थियो ।