प्रचण्डले एयर मार्शल राख्न गरेको सम्झौता गद्दार र राष्ट्रघाती वैद्य माओवादी

Posted on: January 27, 2017 | views: 437

काठमाडौं ।
मोहन वैद्य ‘किरण’ नेतृत्वको नेकपा ९क्रान्तिकारी माओवादी०ले नेपाल आउने भारतीय जेट विमानमा भारतले एयर मार्शल राख्न पाउने गरी नेपाल सरकारले गरेको सम्झौता गद्दार र राष्ट्रघाती भएको बताएको छ ।

नेपाल आउने विमानमा भारतीय एयर मार्शल राख्ने कुरा नेपालको सार्वभौमिकता, राष्ट्रिय स्वाधीनता तथा राष्ट्रिय आत्मसम्मानमाथि गम्भीर आघात पुर्‍याउने प्रकृतिको भएको उसले बताएको छ ।

क्रान्तिकारी माओवादीले नेपाल सरकारको भारतीय सरकारसँग निकृष्ट साँठगाँठ भएको शंका समेत गरेको छ ।

गम्भीर प्रकारको राष्ट्रिय गद्दारी तथा राष्ट्रघात भएके भन्दै क्रान्तिकारी माओवादीका अध्यक्ष मोहन वैद्यद्वारा हस्ताक्षरीत विज्ञप्तिमा ‘तसर्थ हाम्रो पार्टी उक्त विषयबारे तथा सत्य सार्वजनिक गर्न र त्यस प्रकारका राष्ट्रघाती सम्झौताहरुलाई तत्काल खारेज गर्न सरकारसित जोडदार माग गर्दछ ।’ भनिएको छ ।

नेपालको अनुमतिबिना सगरमाथाको उचाई भारतले नाप्ने कुराप्रति माओवादी क्रान्तिकारीले आपत्ति जनाएको छ । उसले अनधिकृत रुपमा नेपाल आउने भारतीय टोलीलाई सगरमाथा प्रवेशमा रोक लगाउन पनि माग गरेको छ ।