राप्रपाको गाई र एमालेको सुर्य जोगाउन बिधेयकको दफानै फेरियो, थ्रेस होल्डमा अझै बिवाद

Posted on: January 23, 2017 | views: 1670

१० माघ, काठमाडौं ।
नेकपा एमालेको चुनाव चिन्ह सुर्य र राष्ट्रिय प्रजातन्त्र पार्टि नेपालको गाई चुनाव चिन्ह जोगाउन दलहरुले निर्वाचन सम्वन्धि बिधेयकको दफा नै हेरफेर गरेका छन् ।

स्थानीय निर्वाचन, राजनीतिक दल र मतदाता नामावली सम्बन्धी पाँचओटा बिधेयकमा सहमति खोजिरहेका दलहरु अझैसम्म निर्वाचनमा राख्ने थ्रेस होल्डमा भने एकमत हुन सकेका छैनन् ।

नेपाली काँग्रेस र एमाले ५ प्रतिशतबाट घटाएर ३ प्रतिशत थ्रेस होल्ड राख्न तयार भएका छन् । तर निर्वाचन आयोगले भने कम्तिमा ५ प्रतिशत राख्न प्रस्ताव गरेको छ ।
यता नेकपा माओवादी केन्द्र भने थ्रेस होल्ड राख्न नहुने पक्षमा उभिन थालेको छ ।

एक दुई सिटे पार्टीलाई समेत काखि च्याप्दै संविधान संशोधनमा बहुमत बटुल्न खोजिरहेका प्रधानमन्त्री पुष्पकमल दाहाल थ्रेस होल्ड राख्न नहुने पक्षमा उभिएका छन् ।

राज्य व्यवस्था समितिले निर्वाचनसम्वन्धी विधेयक टुंगो लगाउन गत पुस ९ गते कांग्रेस सांसद आनन्दप्रसाद ढुंगानाको संयोजकत्वमा ११ सदस्यीय उपसमितिले धेरैजसो विषयमा सहमति जुटाएको बताएपनि मुख्य विषयमा सहमति जुटाउन सकेको छैन ।

सदस्य रामेश्वर फुयाँलका अुनसार राष्ट्रिय चिन्हसँग मिल्ने चुनाव चिन्ह कायम नहुने प्रस्तावको दफा नै सो उपसमितिले हटाएको छ ।

निर्वाचन आयोगले तयार पारेको राजनीतिक दलसम्वन्धी कानुन संशोधन र एकीकरण गर्न बनेको विधेयक(०७३ को मस्यौदामा राष्ट्रिय झण्डा वा चिन्ह प्रयोग गर्ने राजनीतिक दल चुनावका लागि दर्ता हुन नसक्ने व्यवस्था छ । निर्वाचन आयोगको प्रस्ताव हुवहु पाए भएको भए नेकपा एमालेको सूर्य र राप्रपाको गाई चुनाव चिन्ह खोसिने थियो ।

हाल निर्वाचनसँग सम्बन्धी ५ ओटा विधेयकहरु समितिमा छन् । ती मध्ये मतदाता नामावली सम्बन्धी कानुन संशोधन र एकीककरण गर्न बनेको विधेयक, निर्वाचन आयोगका काम कर्तव्य अधिकार सम्बन्धी कानुन संसोधन र एकीकरण गर्न बनेको विधेयक र राजनीतकि दल सम्बन्धी कानुन संशोधन र एकीकरण गर्न बनेको विधेयक पहिले नै समितिमा थिए ।