युएईमा प्रधानमन्त्रीको भाषण-'अब विवादमा अल्झिएर विकास रोक्दैनौं'

Posted on: January 15, 2017 | views: 343

अवुधावी ।
प्रधानमन्त्री पुष्पकमल दाहालले राजनीतिक विवादमा अल्झिएर विगतमा जस्तो विकासमाथिको उपेक्षा अब नदोहोरिने बताएका छन् ।

युएईको आवुधावीमा रहेका नेपालीहरुसँगको अन्तरक्रियाका क्रममा आज प्रधानमन्त्रीले विगतमा दलहरुले विकासलाई नजरअन्दाज गरेका कारण आज मुलुक र जनताले निकै दुःख पाएको बताए ।

प्रधानमन्त्रीले मलुकको विकासलाई केन्द्रमा राखेर विकासका आयोजनाहरुको निर्माण तथा कार्यान्वयनलाई सरकारले विशेष प्राथमिकता दिएको र वैदेशिक रोजगारीबाट आएको पूँजीलाई विकास आयोजनामा केन्द्रित गर्न खोजेको बताए ।

दशौं विश्व भविष्य उर्जा सम्मेलनमा भाग लिन युएई पुगेका प्रधानमन्त्रीले विदेशमा रहेका नेपालीले गरेको अनुभव र पूँजीलाई नेपालको विकासको आधारशीला बनाउने आफ्नो लक्ष्य रहेको बताए ।

प्रधानमन्त्री प्रचण्डले संघीय लोकतान्त्रिक गणतन्त्रमा कसैलाई पेलेर वा ठेलेर समस्याको हल गर्ने नभई सबैका भावनालाई सम्वोधन गरी राष्ट्रिय एकता हासिल गर्न आफू विशेष रुपले केन्द्रित भएको बिचार राखे ।

राष्ट्रिय समस्या समाधान गर्न सरकारले सबैसँग समान रुपले सम्वाद गरिरहेको र राष्ट्रिय सहमति कायम गरी संविधान कार्यान्वयन अघि बढाइने उनको भनाई छ ।

प्रधानमन्त्रीले जलविद्युतको प्रचुर सम्भावना भएर पनि सदुपयोग गर्न नसकेकाले उर्जा सम्मेलन नेपालमा धेरै महत्वपूर्ण हुने बताए ।

भेटका अवसरमा सहभागीहरुले वैदेशिक रोजगारीका क्रममा आफूले भोग्नुपरेका समस्या र अवस्थाबारे प्रधानमन्त्रीलाई अवगत गराएका थिए ।