पुरानै ठाउँमा फर्कियो मोर्चा,फेरि आन्दोलनको घोषणा

Posted on: December 30, 2016 | views: 439

काठमाडौं,पुस १५ । संयुक्त लोकतान्त्रिक मधेसी मोर्चाले आन्दोलनका कार्यक्रम सार्वजनिक गरेको छ । संसद सचिवालयमा दर्ता भएको संविधान संसोधन प्रस्ताव परिमार्जनसहित पारित गर्नका लागि दबाब दिन भन्दै विरोध तथा आन्दोलनको कार्यक्रम घोषणा गरेको हो । आज बसेको बैठकले पुस १८ गते एक बजे जिल्लाजिल्लाका सदरमुकाममा मधेसी, थारु, आदिवासी जनजाति, महिला, मुस्लिम, शिल्पी, किसान, मजदुर, युवा विद्यार्थीसहित सबैलाई ‘खबरदारी विरोध प्रदर्शन’ गर्ने निर्णय गरेको हो ।

संविधान संसोधनको वाचा गरे पनि संविधान संसोधनमा एमालेले संसदमा गरिहरहेको अवरोध मधेसी, थारु, आदिवासी जनजाति, महिला, मुस्लिम, शिल्पी, सिमान्कृत समुदाय विरुद्ध केन्द्रित अलोकतान्त्रिक संसदीय अभ्यास भएको आरोप मोर्चाले लगाएको छ । यस्तो एमालेको क्रियाकलापको मोर्चाले घोर भत्सर्ना गरेको जनाएको छ ।

गत मंसिर १६ गतेदेखि एमालेले लगातार संसद अवरुद्ध गर्दा संशोधन प्रस्ताव, निर्वाचन कानुन सम्बन्धी विधेयक र अख्तियारका निलम्बित प्रमुख आयुक्त लोकमानसिंह कार्कीविरुद्धको महाअभियोग प्रस्तावमा छलफल हुन सकेको छैन । मोर्चाले प्रमुख प्रतिपक्षी नेकपा एमालेका कारण संविधान संशोधन प्रस्ताव अलपत्र परेको र राजनीतिक गतिरोध लम्बिएको निष्कर्ष निकाल्दै त्यसको विरोध गरेको छ ।