प्रधानमन्त्री दाहालको आरोप-'चुनावको मिति घोषणा गर्न एमालेले दिएन'

Posted on: December 18, 2016 | views: 360

विराटनगर ।
प्रधानमन्त्री पुष्पकमल दाहालले संविधान संशोधन प्रस्तावको विरोध गरिरहेको एमालेकै कारण स्थानिय चुनावको मिति घोषणा हुन नसकेको आरोप लगाएका छन् ।

माओवादी केन्द्रका अध्यक्ष समेत रहेका दाहालले संसद अवरुद्ध हुँदा अख्तियार प्रमुख लोकमानसिंह कार्कीविरुद्धको महाअभियोग प्रस्तावमाथिको छलफल पनि रोकिएको र निर्वाचनको मिति घोषणा गर्न पनि नदिइएको आरोप लगाए ।

माओवादी समर्थक पत्रकारहरुको संगठन प्रेस सेन्टर मोरङले आइतबार आयोजना गरेको पत्रकार भेटघाटमा प्रधानमन्त्री दाहालले राजनीतिक गतिरोध अन्त्य हुने कि नहुने भन्ने कुरा एमालेमा भर परेको बताए ।

आफ्ना मागमा संसद अवरोध, कुर्सी तोडफोड र सुटकेस च्यात्न समेत पछि नपरेका माओवादी अध्यक्ष दाहालले एमालेले संसदमा गर्दै आएको अवरोधलाई भने गैरलोकतान्त्रिक र गैरसंसदीय प्रक्रिया भएको बताए ।

‘प्रतिपक्षले तर्क वितर्क गरेर संशोधन प्रस्तावलाई असफल पार्छ भने त्यो उसको अधिकार हो । तर, त्यसको छिनोफानो गर्ने थलो संसद नै हो,’ प्रधामनन्त्री दाहालले भने ‘त्यसकारण जो साथीहरुले संसद अवरुद्ध गर्नुभएको छ उहाँहरुले अविलम्ब यो गैरसंसदीय, गैरलोकतान्त्रिक प्रक्रियालाई बन्द गर्नुपर्छ । आफ्नो मत संसदभित्रै राख्नुपर्छ र संसदबाट नै यसको टुंगो लगाउनुपर्छ । जति छिटो प्रतिपक्षका साथीहरुले बुझ्नुहुन्छ, त्यति छिटो राजनीतिक गतिरोधको अन्त्य हुन्छ ।’

विवादास्पद र देशभर बिरोध भइरहेको संविधान संशोधन प्रस्ताव देशलाई एकता गर्नेगरि ल्याएको तर्क गर्दै प्रधानमन्त्री दाहालले एमालेले संसद अवरुद्ध गरेर देशको निकासलाई रोकेको आरोप लगाए ।