संविधान संशोधन हुँदैन, प्रचण्डले सय दिनमा सिन्को भाँचेनन्-बामदेव गौतम

Posted on: November 14, 2016 | views: 232

२९ कार्तिक, प्यूठान ।
पूर्व उपप्रधानमन्त्री तथा एमाले उपाध्यक्ष बामदेव गौतमले कुनैपनि हालतमा संविधान संशोधन नहुने बताएका छन् ।

विदेशीको इसारामा नेपाललाई टुक्र्याउने उद्देश्यले सीमांकन हेरफेर सहितको संशोधन मान्य नहुने गौतमको भनाई छ ।

एमाले निकट पत्रकारहरुको संस्था प्रेस चौतारी प्यूठानले सोमवार खलंगामा गरेको पत्रकार भेटघाटमा बोल्दै गौतमले सरकार जनताको चाहना भन्दा विदेशीको चाहनामा अघि बढेको आरोप लगाए ।

मधेशवाद’को नाराले हिमाल-पहाडलाई अलग बनाएर देश टुक्राउने खेलमा लागेको भन्दै गौतमले भने  ‘सरकार विदेशीको आडमा अघि बढेको छ । विदेशी रिजाउने लक्ष्य राखिएकोले तराई पहाड छुट्टाउने खेल हामी हुन दिँदैनौं ।’

मधेशमा १० प्रतिशत जनमत ल्याउन नसक्नेहरुले अरुलाई ‘मधेश बिरोधी’को आरोप लगाएको गौतमको भनाई छ ।

‘संविधान जारी गर्ने बेलामा विरोध गर्ने विधंस मच्चाउनेहरु अहिले त्यही संविधान संशोधन गर्ने भन्न नमिल्ने भन्दै गौतमको प्रश्न थियो  ‘हिमाल(पहाडलाई तराईबाट अलग्याएर नेपाल बन्न सक्दैन ।’

नेपालको नाम फेर्ने, जातिय विभाजन गर्ने, झण्डा फेर्ने जस्ता नाराबाट माओवादी पार्टी अगाडि बढेको इतिहास कोट्याउँदै गौतमले भने ‘माओवादी नेतृत्वको सरकारले १०० दिनमा सिन्को समेत भाँच्न सकेन ।’

अख्तियार दुरुपयोग अनुसन्धान आयोगका प्रमुख लोकमानसिंह कार्की प्रकरणका बारेमा उनले भने, ‘लोकमानले आफुलाई राजामहाराजा सम्झेर अघि बढे, उनलाई कानुन बमोजिम कारवाही हुन्छ ।’