लोकमान बिरुद्ध बहस छाडेर मधेश केन्द्रित सांसद भत्ता बुझेर हिँडे

Posted on: November 11, 2016 | views: 380

२६ कार्तिक, काठमाडौं ।
मधेशी मोर्चाका सांसदहरुले निलम्बित अख्तियार प्रमूख लोकमानसिंह कार्की बिरुद्धको महाअभियोग प्रस्ताव छाडेर संसदनै बहिस्कार गरि हिँडेका छन् ।

सरकारसँग भएको तीन बुंदे सहमति कार्यान्वयन नभएको आरोप लगाउंदै मधेश केन्द्रित दलका सांसदहरुले बैठक बहिष्कार गरेको बताएका छन् ।

बैठक बहिष्कार गर्नु अघि सभामुखसंग समय लिएर संघीय समाजवादी फोरमका नेता सांसद अशोक कुमार राईले मधेशी दल र सरकार वीच भएको सहमति कार्यान्वयन गर्ने सम्बन्धमा मन्त्री परिषदले निर्णय गरेर पनि कार्यान्वयन नभएको र उल्टै कार्यकर्ता थुन्ने एवं मुद्दा लगाउने कार्य हुने गरेकोले यस्तो अवस्थामा बैठकको आजको कार्वाहीमा मधेशवादी दलको समर्थन रहन नसक्ने भन्दै बैठक बहिष्कार गर्नु परेको बताए ।

सांसद राईको भनाइ संगै मधेशवादी दलका सांसदहरुले संसदको बैठक बहिष्कार गरेको भन्दै उठेर हिँडेका थिए ।

संसद बैठक बहिस्कार भन्दै पुग्न नपाउँदै उठेर हिँडेपनि मधेशी मोर्चा आवद्ध सबै सांसदहरुले संसदबाट पाउने कुनैपनि सेवा र सुविधा नछाडेको संसद सचिवालयले जानकारी दिएको छ ।
आजको संसद बैठकमा उपस्थित सबै सांसदहरुले भत्ता पाउनेगरि हस्ताक्षर गरेका छन् ।

संसदको आजको बैठकमा अख्तियार दुरुपयोग अनुसन्धान आयोगका प्रमुख आयुक्त  लोकमानसिंह कार्की विरुद्ध परेको महाभियोगको प्रस्ताव माथि छलफल भयो ।

संसद बैठकको शुन्य समयमा अहिले सांसदहरुले भारत सरकारले पांचसय र एक हजार रुपैंयाको नोट नचलाउन गरेको निर्णयले नेपालको आर्थिक कारोवार र अर्थतन्त्रमा पार्ने असरप्रति सरकार र सदनको ध्यानाकर्षण गराएका थिए ।

सांसदहरुले भारतीय सरकारसंग सरकारी तवरबाटै यथाशिघ्र वार्ता गरी यसबाट नेपाली अर्थतन्त्रमा पर्ने नकारात्मक असरलाई कम गर्ने गरी समस्या सुल्झाउन सुझाव दिएका थिए ।