चौतर्फी हमला भएको भन्दै प्रतिरक्षा गर्न प्रचण्डले कार्यकर्तासँग गुहार मागे

Posted on: November 09, 2016 | views: 580

२४ कार्तिक, काठमाडौं ।
नेकपामाओवादी केन्द्रका अध्यक्ष एवं प्रधानमन्त्री पुष्पकमल दाहालले पछिल्लो समयमा सरकार र पार्टीविरुद्ध चौतर्फी हमला भएकाले त्यसको प्रतिरक्षा गर्न कार्यकर्तासँग आग्रह गरेका छन् ।

आफु नेतृत्वमा सरकारले गरेको गलत कामको आलोचना गर्दा सच्चिनुको साटो उल्टै प्रतिकार गर्न भन्दै प्रधानमन्त्री दाहालले कार्यकर्ताको सहयोग मागेका हुन् ।

पार्टी भातृ विद्यार्थी संस्था अनेरास्ववियू 'क्रान्तिकारी'ले काठमाडौँमा गरेको ‘अगुवा प्रशिक्षण कार्यक्रम’मा नेकपा 'माओवादी केन्द्र'का अध्यक्षसमेत रहेका उनले सामाजिक सञ्जालमार्फत विस्तारैविस्तारै माओवादी सिद्धान्तविरुद्ध प्रहार हुन थालेको भन्दै चिन्ता व्यक्त गरे ।

उनले अहिले सामाजिक सञ्जाल र केही मिडियामार्फत माओवादीमाथि आक्रमण र घेराबन्दी भइरहेकोले पार्टीको नेतृत्व र सरकारले गरेका कामको प्रतिरक्षा गर्न युवा विद्यार्थीले भूमिका खेल्नुपर्ने बताए ।

त्यस अवसरमा माओवादी केन्द्रका नेता नारायणकाजी श्रेष्ठले पार्टीको क्रान्तिकारी चरित्रमा स्खलन, प्रदूषण र भ्रष्टीकरण भएको बताउँदै पुनःएकीकरण र रुपान्तरण गर्नुपर्ने धारणा राखेका थिए ।


अर्का नेता रामबहादुर थापाले देशमा नयाँ कम्युनिस्ट पार्टीको अझै आवश्यकता रहेको बिचार राखे ।

अखिल क्रान्तिकारीका अध्यक्ष नरेन्द्र न्यौपानेले आफ्नो सङ्गठनले राजनीतिक र शैक्षिक दुवै मुद्दा सँगसँगै उठाउने बिचार सो अवसरमा व्यक्त गरे ।