प्रधानमन्त्री भन्छन्-'राष्ट्रपती र काँग्रेस एमालेको सहमतीमा बिदाको निर्णय गरेको हो'

Posted on: October 28, 2016 | views: 335

१२ कार्तिक, काठमाडौं ।
भारतीय राष्ट्रपती आउँदा सार्वजनिक बिदा दिने पुष्पकमल दाहाल प्रचण्ड सरकारको निर्णयको सर्वत्र बिरोध भएपछि उनले त्यसको बचाउ गर्दै राष्ट्रपती र अन्य दलको सहमतीमा त्यस्तो निर्णय गरेको बताएका छन् ।

मन्त्रीपरिषद बैठकमा प्रधानमन्त्री आफैंले सार्वजनिक बिदा दिन माग गर्दै प्रस्ताव गरेको विषय बाहिरिएपछि त्यसबाट बच्न प्रधानमन्त्रीले राष्ट्रपतीसँग शिर्ष नेताहरु सम्मिलित बैठकमा सर्वसम्मतीपछि बिदाको निर्णय भएको बताएका हुन् ।

छिमेकी भारत र चीनका राष्ट्र प्रमूख नेपाल आउँदा एक दिन सार्वजनिक बिदा दिँदा राम्रो हुने राजनीतिक दलका नेताहरु लगायत सुरक्षा निकायबाट राय आएपछि मन्त्रिपरिषदले बिदा दिने निर्णय गरेको उनको भनाई छ ।

शुक्रबार व्यवस्थापिका–संसदमा अख्तियार दुरुपयोग अनुसन्धान आयोगका प्रमूख आयुक्त लोकमानसिंह कार्कीविरुद्ध दर्ता भएको महाअभियोग प्रस्ताव पारित गर्न प्रधानमन्त्रीको ध्यानाकर्षण गराउन आएको सयुंक्त विद्यार्थी मण्डलसँगको भेटमा प्रधानमन्त्रीले यस्तो अभिव्यक्ति दिएका हुन् ।

भेटमा प्रधानमन्त्रीले भने  ‘भ्रमणको तयारीका लागि राष्ट्रपतिज्यू समेतको सहभागितामा राष्ट्रपति निवासमा बैठक भएको थियो । उक्त बैठकमा राजनीतिक दलका प्रमूख नेताहरु पनि हुनुहुन्थ्यो । छिमेकीहरु प्रतिको सद्भाव र काठमाडौं उपत्यकाको ट्राफिक व्यवस्थापन समेतलाई विचार गरेर एक दिन बिदा दिँदा राम्रो सन्देश जाने राय आएपछि मन्त्रिपरिषदको बैठकले निर्णय गरेको हो । बिदा दिने प्रस्ताव र निर्णय प्रधानमन्त्री र प्रचण्डकै भएकोझैं गरी प्रचार गरिएको छ, यो बिलकूल गलत र भ्रामक कुरा हो ।’

भेटमा प्रधानमन्त्रीले विद्यार्थीहरुको एकताले आफू प्रभावित भएको भन्दै आफू सबैसँग समान धारणा बनाएर महाअभियोग पारित गराउने पक्षमा रहेको समेत बताए ।

प्रधानमन्त्रीले भने, ‘हरेक काममा तपाईहरुले जुन एकता प्रदर्शन गर्नुभएको छ, यसले राजनीतिक नेताहरुलाई पनि प्रेरणा मिलेको छ । अख्तियारको दुरुपयोग रोक्ने, सुशासन कायम गर्ने जिम्मेवारी पाएको व्यक्तिलाई नै महाअभियोग लगाउनुपर्ने बाध्यता पक्कै राम्रो होइन । तर, यसले सुशासन र भ्रष्टाचार नियन्त्रणमा सकारात्मक शिक्षा पक्कै दिन्छ ।’

भेटमा विद्यार्थी नेताहरुले संसदमा पेश भएको महाअभियोग प्रस्ताव सकारात्मक रहेको भन्दै प्रस्ताव पारित गर्न विशेष भूमिका खेल्न प्रधानमन्त्रीलाई आग्रह गरेका थिए ।