आज संसदमा जे बोले प्रधानमन्त्रीले

Posted on: October 19, 2016 | views: 315

३ कार्तिक, काठमाडौं ।

प्रधानमन्त्री पुष्पकमल दाहालले संविधान कार्यान्वयनका लागि एकताबद्ध भएर लाग्न सवैलाई आग्रह गर्नु भएको छ ।

व्यवस्थापिका संसदको वैठकलाई आज सम्बोधन गर्नुहुदै प्रधानमन्त्री दाहालले तोकिएकै समयमा निर्वाचन गर्न नसकिए देश ठूलो दुर्घटनातर्फ जाने भएकाले पक्ष÷प्रतिपक्ष नभनी संविधान कार्यान्वयनका लागि एकताबद्ध हुनु पर्ने बताउनुभयो ।

प्रधानमन्त्री दाहालले तराई, मधेशी, थारु, आदीवासी जनजाती लगायतका माग सम्बोधन लागि संविधान संशोधनको ड्राफ्ट अन्तिम चरणमा पुगेको र आन्दोलनरत दलहरुका जायज मागहरु सम्बोधन गरिने प्रतिवद्धता गर्नुभयो ।

प्रधानमन्त्री दाहालले तिहार र छठसम्ममा सतपक्ष, प्रतीपक्ष र आन्दोलनरत पक्षबीचमा समझदारीको वातावरण बनाएर संविधान संशोधन गर्ने र निर्वाचन तर्फ देशलाई लैजाने विषय सरकारले उच्चप्राथमिकता राखेको बताउनुभयो ।

प्रधानमन्त्री दाहालले विगतका वार्ताहरुले बढी वादविवाद र समस्या समाधानमा भन्दा जटीलता पैदा गर्ने गरेकाले अहिले सरकारले समस्या समाधानका लागि गृहकार्यमा जोड दिएकोे बताउनु भयो ।

प्रधानमन्त्री दाहालले सरकारले स्थानीय तह पुनरसंरचनाको कामका आयोगसँग सहजीकरण गर्दै अघि बढिरहेको पनि बताउनु भयो ।

सम्बोधनका क्रममा प्रधानमन्त्री दाहालले राष्ट्रिय गौरवका आयोजनाहरु मेलम्ची खानेपानी आयोजना, सडक निर्माण र अस्पतालहरुको अनुगमन र निरिक्षण गरेर समयमानै काम सम्पन्न गर्न र सुधार गर्न निर्देसित गरिएको जानकारी सदनलाई गराउनु भयो ।

उहाँले भुकम्प पीडितको आवास अनुदान वितरणको कार्यलाई तिव्र गरिएको र चार लाख २० हजार भन्दा बढीले पहिलो किस्ता अनुदान लिइसकेको जानकारी पनि दिनुभयो ।    
        
प्रधानमन्त्री दाहालले ब्रिक्स–विमेष्टेक आउटरिच सम्मेलनका क्रममा भारतका प्रधानमन्त्री नरेन्द्र मोदी र चीनका राष्ट्रपती सि जिङ पिङसँग संयुक्त रुपमा अनौपचारिक कुराकानी गर्ने अवसर जुटेको र त्यसमा त्रिदेशीय साझेदारी र नेपालले लिन सक्ने लाभका विषयमा छलफल गर्ने अवसर सुखद संयोग भएको बताउनु भयो ।

प्रधानमन्त्री दाहालले आफ्नो भारतको औपचारीक भ्रमणका क्रममा नेपाल भारतबीचको विश्वास सुदृढ गर्ने र नेपालको हित हुने गरी यस अघि सहमति भएका परियोजनाहरुको प्रभावकारी र शिघ्र कार्यान्वयनमा जोड दिईएको उल्लेख गर्नुभयो ।

प्रधानमन्त्री दाहालले आफ्नो भारतको औपचारिक भ्रमण र ब्रिक्स–विमेष्टेक आउटरिच सम्मेलनले छिमेकी मुलुकहरुकाबीच थप सम्बन्ध सुदृढ बनाउन सफल भएको पनि बताउनु भयो ।