नयाँ कार्यदिशा बनाउने भन्दै प्रचण्ड माओवादीले राष्ट्रिय भेला डाक्यो

Posted on: September 26, 2016 | views: 441

१० असोज, काठमाडौं ।
सत्ता सम्हालेपछि अध्यक्ष पुष्पकमल दाहाल प्रचण्डको भारत भ्रमण र गरेका बिवादास्पद निर्णयका कारण जनताको चर्को बिरोध खेपिरहेको सत्तारुढ नेकपा माओवादी केन्द्रले राष्ट्रिय भेला गर्ने निर्णय गरेको छ ।

सोमबार माओवादी हेडक्वाटरको बैठकले कात्तिक १० र ११ गते काठमाडौंमा राष्ट्रिय भेला बोलाउने निर्णय गरेको छ ।

पुसमा गर्ने भनिएको पार्टी महाधिवेशन नयाँ सरकार गठनसँगै स्थगित भएपछि माओवादीले भेला डाकेर नयाँ राजनीतिक कार्यदिशा बनाउने बताएको छ ।

विगतमा जस्तै भेलामा अध्यक्ष प्रचण्डले पार्टीको नयाँ कार्यदिशासहितको राजनीतिक प्रतिवेदन पेश गर्ने भएका छन् ।

राजनीतिमा हांस्यको बिषय बनिरहेको २५ सय जनाको जम्बो महाधिवेशन आयोजक समितिलाई घटाउने विषयमा भेलामा छलफल हुने ठानिएको छ ।

बैठकका निर्णयबारे जानकारी दिँदै पार्टी प्रवक्ता पम्फा भुसालले ‘सचिवालयको बैठकमा पार्टी संगठनबारे गम्भीर छलफल भएको र पार्टीको आन्तरिक संगठनलाई व्यवस्थित गर्न कार्तिक १० र ११ गते राष्ट्रिय भेलाको आयोजना गर्ने निर्णय जानकारी दिइन् ।

प्रवक्ता भुसालका अनुसार ‘राष्ट्रिय भेलामा संगठनको आकारलाई व्यवस्थित र चुस्त बनाउने, स्थानीय तहको निर्वाचन लक्षित संगठनात्मक संरचना निर्माण गर्ने र स्थानीय निर्वाचनमा पार्टीको विजयलाई सफल तुल्याउने कार्य्विधि, संगठन र जिम्मेवारीबारे’ छलफल हुनेछ ।


भेलामा बरिष्ठ उपाध्यक्ष रहेका नारायणकाजी श्रेष्ठले फरक मत सहितको राजनीतिक प्रतिवेदन पेश गर्ने बताइन्छ ।

यसअघि भएका माओवादी केन्द्रिय बैठकहरुमा प्रचण्डले राख्दै आएका अधिकाशं पार्टीको कार्यदिशा सन्दर्भमा तत्कालिन उपाध्यक्ष रहेका बाबुराम भट्टराईले फरक मत सहितको प्रतिवेदन प्रस्तुत गर्दै आएका थिए ।

हाल बाबुराम भट्टराई नयाँ शक्ति पार्टी खोलेर आफैं अध्यक्ष बनेका छन् ।