हिन्दी भाषाको बिरोध भएपछि मधेशी मोर्चाले घुमाउरोगरि यस्तो माग राख्यो

Posted on: September 25, 2016 | views: 809

९ असोज, काठमाडौं ।
वर्तमान गठबन्धनसँग तीनबुँदे सहमति गरेर सरकारलाई समर्थन गरेको मधेसी मोर्चाले हिन्दी भाषालाई नेपालको कामकाजी भाषा बनाउने मागको सर्वत्र विरोध भएपछि घुमाउरो पाराले भाषाको माग राखेको छ ।

मोर्चाले सबै राष्ट्रिय भाषालाई कामकाजी भाषा बनाउन माग गर्दै हिन्दी भाषालाई समेत त्यस्तो सबै भाषामा समेटेको छ ।

प्रधानमन्त्री प्रचण्ड, दुई उपप्रधानमन्त्री विमलेन्द्र निधि र कृष्णबहादुर महरासँग मोर्चाका नेताहरुको भएको पटकपटकको अनौपचारिक छलफलमा मोर्चाले यस्तो माग अडान सहित राखिरहेको छ ।

मोर्चाले प्रदेशअनुसार बोल्ने भाषा फरक हुनसक्ने तर्क गर्दै कुनै एउटा भाषा लाद्ने नभइ भाषामा राष्ट्र स्वतन्त्र हुनपर्ने तर्कसहित यस्तो सर्त अघि सारेको आजको अन्नपूर्णमा समाचार छ ।

‘हामीले हिन्दीमात्र कामकाजीको भाषा हुनुपर्छ भनेका होइनौं, नेपालमा बोलिने र राष्ट्रिय भाषा घोषणा गरेका सबै भाषा कामकाजी हुनुपर्छ भनेर प्रस्ताव गरेका हो’ छलफलमा सहभागी सद्भावना नेता मनीष सुमनले भने ।

तर उनले हिन्दी भाषालाई नभनेको वा नसमेटेको भने बताउन सकेनन् । स्मरणीय छ मधेशी मोर्चाले मधेश आन्दोलनका नाममा संघियताको विषय मात्र उठाएपनि अहिले सम्झौता गर्ने बेलामा भारतीय मारिंदा तिनलाई शहिद, नेपाली नागरिकता लिएका भारतीयपनि राष्टप्रमुख हुन पाउनुपर्ने, भारतीय हिन्दी भाषा नेपालको कामकाजी भाषा हुनुपर्ने जस्ता राष्टघाती माग राखिरहेको छ ।