मोदीलाई भेट्न नपाउँदै महतद्धारा प्रचण्डको भारत भ्रमण सफल भएको भन्दै यस्तो दाबी

Posted on: September 17, 2016 | views: 412

१ असोज, नयाँदिल्ली ।
परराष्ट्रमन्त्री डा प्रकाशशरण महतले प्रधानमन्त्री पुष्पकमल दाहाल प्रचण्डको भारत भ्रमण जारी रहेकै समयमा भ्रमण सफल भएको दाबी गरेका छन् ।

मन्त्री महतले प्रधानमन्त्रीको भारत भ्रमणले दुई देशबीचको सम्बन्धलाई नयाँ उचाइ दिएको र यो भारत भ्रमण सफल भएको बताएका हुन् ।

भारतस्थित एक होटलमा नेपाली पत्रकारहरुसगँ कुराकानी गर्दै परराष्ट्रमन्त्री डा प्रकाशशरण महतले भ्रमणको मूल लक्ष्य सद्भावना र सहयोग बढाउने रहेको र त्यसमा त्यसमा भ्रमण टोली सफल भएको तर्क गरे ।

भ्रमणबारे जानकारी दिन आयोजित पत्रकार सम्मेलनमा परराष्ट्रमन्त्री डा महतले भारत सरकार, राजनीतिक दल र जनताको तहमा पनि प्रधानमन्त्रीको भ्रमणबाट उच्च उत्साह देखिएको बताए । यो भ्रमणले दुई देशबिचको सम्बन्धमा नयाँ आयाम स्थापित गर्नेमा आफु आशाबादी रहेको महतको भनाई छ ।

भारतका प्रधानमन्त्री नरेन्द्र मोदी सहित भएको द्विपक्षीय वार्ताबारे जानकारी दिँदै महतले विगतमा भएका सम्झौता एवम् प्रतिबद्धतालाई निश्चित समय सीमाभित्र कार्यान्वयनमा ल्याइने र त्यसका लागि दुई देशबीचमा भएका मन्त्री, सचिव एवम् प्राविधिकस्तरीय संयन्त्रलाई क्रियाशील गराउने प्रतिबद्धता व्यक्त गरिएकाले पनि आगामी दिनमा विकासको विषयले प्राथमिकता पाउने उनको दाबी थियो ।

परराष्ट्रमन्त्री डा महतले भारत सरकारले भूकम्पपीडितलाई उपलब्ध गराएको एक विलियन डलरमध्ये ७५० मिलियन डलर सहुलियत ऋण र सहुलियत ऋणको सेवा र सामग्री ७५ प्रतिशत भारतको हुनुपर्ने व्यवस्थालाई हटाएर सहज बनाउने सहमति भएको पनि जानकारी दिए ।

ढल्केबरमा सबस्टेसन बनाउने कुरामा सहयोग गर्ने, तराई हुलाकी राजमार्गमा दोस्रो चरणको महत्वपूर्ण आयोजनामा सहुलियत ऋण दिने र ४०० केभी टान्समिसन लाइन गोरखपुर– बुटवललाई पनि अगाडि बढाउने सहमति भएको पनि उनको भनाई छ ।

पञ्चेश्वर आयोजना अगाडि बढाइने र विद्युत् व्यापारमा सहज पहुँचलाई पनि द्विपक्षीय मन्त्रिस्तरीय संयन्त्रले त्यसलाई टुङ्ग्याउने सहमति भएको, सीमा सुरक्षाका सन्दर्भमा थप सहजीकरण गर्ने, थप नाका खोल्ने, सिँचाइ आयोजना, लिङ्क रोडलाई विकसित गर्ने, रेल्वे लिंकलाई चाँडोभन्दा चाँडो सम्पन्न गर्ने विषयमा कुरा अगाडि बढाइएको पनि मन्त्री महतको भनाई छ ।

संविधानका विषयमा भारत सरकारले पहिले नै स्वागत गरेको जिकिर गर्दै मन्त्री डा महतले लोकतन्त्रको सुदृढीकरणमा जाने प्रक्रियालाई सराहना गरेको भन्दै नेपालको संविधानको अहिलेसम्म स्वागत नगरेको भारतको बचाउ गरे ।

प्रधानमन्त्री दाहालको राजकिय भारत भ्रमणको तेस्रो दिन आज प्रधानमन्त्री दाहालले बिहानै व्यवसायीहरुसगं पनि भेटवार्ता गरेका छन् ।
भेटका क्रममा दुई देशबिचको व्यापार र बिकाससमबन्धि छलफल भएको थियो । प्रधानमन्त्री दाहाल हिमाञ्चलस्थित नाथ्पा झार्की लघु जलबिद्युत आयोजनाको अवलोकन सहितका कार्यक्रममा सहभागी भइरहेका छन् ।