चारदिने भारत भ्रमणमा आएका प्रधानमन्त्रीले एकदिन यसरी बिताए

Posted on: September 15, 2016 | views: 463

३० भदौ, नयाँदिल्ली ।
प्रधानमन्त्री पुष्पकमल दाहाल चार दिने औपचारिक भारत भ्रमणका क्रममा आज अपरान्ह भारतको राजधानी नयाँदिल्ली आइपुगनेका छन् ।

भारतीय प्रधानमन्त्री नरेन्द्र मोदीको औपचारिक निमन्त्रणामा नयाँदिल्ली आएका प्रधानमन्त्री दाहाललाई इन्दिरा गान्धी अन्तर्राष्ट्रिय विमानस्थलमा भारतीय विदेशमन्त्री सुष्मा स्वराजले स्वागत गरिन् ।

प्रधानमन्त्री दाहाल धर्मपत्नी सीता दाहालका साथमा भारतका राष्ट्रपति भवनमा रहनेछन् । प्रधानमन्त्रीसँग पत्नी सीता दाहाल, परराष्ट्रमन्त्री डा प्रकाशशरण महत, भौतिक पूर्वाधार तथा यातायातमन्त्री रमेश लेखक लगायतका उच्च अधिकारी सहित १ सय २४ जनाको जम्बो टोली रहेको छ ।

कानुनअनुसार २३ जनामात्र विदेशी प्रमण्डलमा सहभागी हुनुपर्नेमा प्रधानमन्त्री प्रचण्डले भने राज्य ढुकुटीको दुरुपयोग गर्दै आफ्ना आसेपासे सहित दर्जनौं पत्रकार र कर्मचारी भारत घुम्न ल्याएका छन् ।

प्रधानमन्त्री दाहालले भोलि शुक्रबार आफ्ना भारतीय समकक्षी नरेन्द्र मोदीसँग औपचारिक भेटवार्ता गर्ने कार्यक्रम छ ।

भोलि नै प्रधानमन्त्री दाहालले भारतीय राष्ट्रपति मुखर्जीसँग भेटघाट गर्नेछन् । राष्ट्रपति भवनमा भोलि नै आयोजना हुने स्वागत समारोहमा प्रधानमन्त्री सहभागी हुने कार्यक्रम रहेको छ ।

भोलि बिहान प्रधानमन्त्री दाहाल राजघाटस्थित महात्मा गान्धीको समाधिस्थलमा गई  श्रद्धाञ्जलि अर्पण गर्नेछन् ।
भारत भ्रमणका क्रममा प्रधानमन्त्री दाहालले आजै भारतीय बामपन्थी नेता सीताराम येचुरीसंग पनि भेट गरे । भेटमा द्धिपक्षीय हित र सम्वन्धका विषयमा कुराकानी भएको बताइएको छ ।

प्रधानमन्त्री दाहालले आजै नयाँदिल्लीमा रहेका प्रवासी नेपालीहरुसंग अन्तक्र्रिया गरे ।
अन्र्तक्रियाका क्रममा प्रधानमन्त्री दाहालले नेपालको परिवर्तनका लागि प्रवासी नेपाली समुदायले खेलेको भूमिका प्रशंसनीय रहेको बताए ।

अखिल भारत नेपाली एकता समाजले नयाँ दिल्लीस्थित नेपाली दूतावासमा गरेको अन्र्तक्रियालाई सम्बोधन गर्दै प्रधानमन्त्रीले नेपालको परिवर्तनको प्रक्रियामा प्रवासी नेपाली समुदायको भूमिकालाई सरकारले उच्च मूल्याङ्कन गरेको बताए ।

त्यसअघि त्रिभुवन अन्तर्रा्ष्ट्रिय विमानस्थलमा प्रधानमन्त्री दाहाललाई सभामुख ओनसरी घर्ती, उपप्रधानमन्त्रीद्वय विमलेन्द्र निधि र कृष्णबहादुर महरा, मन्त्रीगण, संवैधानिक अङ्गका प्रमुख, मुख्य सचिव, सरकारका उच्चपदस्थ अधिकृत तीनवटै सुरक्षा निकायका प्रमुखलगायतले बिदाइ गरेको थियो ।

प्रधानमन्त्री दाहाल भारतको राजकीय भ्रमण पूरा गरी आगामी असोज २ गते स्वदेश फर्कने कार्यक्रम रहेको छ ।