केपी ओलीले भने रअ प्रमुखलाई भेटेको छैन, बहकाउमा संविधान संशोधन हुँदैन’

Posted on: September 05, 2016 | views: 354

२० भदौ, काठमाडौं ।
बैंककमा स्वास्थ्य परिक्षणका बहानामा भारतीय खुफिया एजेन्सी रअका प्रमुखसँग भेटेर गोप्य छलफल गरेको आरोपलाई प्रमुख प्रतिपक्षी दल नेकपा एमालेका अध्यक्ष केपी शर्मा ओलीले अस्विकार गरेका छन् ।

बैंककमा स्वास्थ्य परीक्षण गरेर सोमबार स्वदेश फर्किए लगत्तै विमानस्थलमा पूर्व प्रधानमन्त्री समेत रहेका ओलीले आफ्नो भ्रमणलाई लिएर केहीले गलत प्रचार गरेको आरोप लगाए ।

एमाले अध्यक्ष ओलीले भने, ‘अत्यन्तै निन्दनीय तरिकाले झुटको खेती गरेको पाइयो । त्यसमा कुनै सत्यता छैन ।’

एमाले अध्यक्ष ओलीले चिकित्सकहरुको रिपोर्टमा आफ्नो स्वास्थ्य ठीक रहेको भन्दै देश र जनताको पक्षमा तथा संविधान कार्यान्वयनमा भूमिका खेल्न सक्ने भएर आएको पत्रकारमाझ बताए ।

ओलीले संविधान संशोधनबारे यसअघिकै जस्तै संविधान गतिशील दस्ताबेज भएको भन्दै संशोधन हुनसक्ने बताए ।

ओलीले भने-'तर, कसैको दबाव र बहकाउमा होइन, संविधान संशोधन आवश्यकता र औचित्यका आधारमा हुन्छ । कसैको दबावमा देशलाई अहित हुने गरी, लोकतन्त्रलाई अफ्ठ्यारोमा पार्ने गरी हुन सक्दैन ।'