प्रधानमन्त्रीका विशेष दूत बनेर उपप्रधान एंव गृहमन्त्री विमलेन्द्र निधि भारत उडे

Posted on: August 18, 2016 | views: 318

२ भदौ, काठमाडौं ।

प्रधानमन्त्री पुष्पकमल दाहालको विशेष दूतका रुपमा उपप्रधान एंव गृहमन्त्री विमलेन्द्र निधि आज भारत प्रस्थान गर्नुभएको छ ।

नयाँ सरकार गठन भएको सन्दर्भमा प्रधानमन्त्रीको विशेष प्रतिनिधि पठाउने सरकारको निर्णयअनुसार उपप्रधानमन्त्री निधि दुई देशबीचको उच्च भ्रमणको तयारी तथा राजनीतिक भेटघाटका लागि भारत प्रस्थान गर्नुभएको हो ।

प्रस्थान गर्नुअघि त्रिभुवन विमानस्थलमा पत्रकारसँग कुरा गर्दै उपप्रधानमन्त्री निधिले आफ्नो भ्रमण प्रमुख रुपमा नेपाल र भारतबीचको उच्चस्तरीय भ्रमणको विषयमा केन्द्रित रहने बताउनुभयो ।

मन्त्री निधीले आफ्नो भारत भ्रमणको प्रमुख उद्देश्य नेपालका राष्ट्रपतिका तर्फबाट भारतका राष्ट्रपतिलाई नेपाल भ्रमणका लागि निम्ता दिने र नेपाल भ्रमणको शीघ्र मिति तय गर्न आग्रह गर्ने रहेको बताउनसभयो ।

त्यस्तै नेपालका प्रधानमन्त्रीलाई भारतका प्रधानमन्त्रीले भारत भ्रमणको लागि निम्ता गर्नुभएको र त्यसको तयारी सम्बन्धी छलफल तथा नेपालका प्रधानमन्त्रीको भारत भ्रमणका बेला नेपाल–भारतका बीचमा हुने छलफलका विषयको प्रारम्भिक तयारी गर्ने रहेको उपप्रधानमन्त्री निधिले जानकारी 
दिनुभयो ।

उपप्रधानमन्त्री निधिले नेपालको राष्ट्रिय हित र परिवर्तनका पक्षमा भारत सरकार र त्यहाँका जनताको साथ रहने अपेक्षा गर्नुभयो ।

गृहमन्त्री निधिले नयाँदिल्लीमा रहँदा भारतीय राष्ट्रपति, प्रधानमन्त्री, विदेशमन्त्री, गृहमन्त्रीलगायत त्यहाँका राजनीतिक पार्टी र उच्चपदस्थ अधिकारीसँग भेटघाट गर्नुहुने छ ।