सुनुवाई समिति सभापतिमा गुरुङ निर्विरोध

Posted on: June 22, 2016 | views: 176

८ असार, काठमाडौं ।
व्यवस्थापिका संसदको संसदीय सुनुवाई विशेष समितिको सभापतिमा प्रमुख प्रतिपक्षी दल नेपाली कांग्रेसका नेता एवं सांसद कुलबहादुर गुरुङ निर्विरोध निर्वाचित हुनु भएको छ ।

सभापति पदका लागि अर्को कुनै उम्मेदवारी नपरेपछि गुरुङ निर्विरोध निर्वाचित हुनु भएको हो ।

निर्विरोध निवाचित भए लगत्तै सभामुख ओनसरी घर्तीबाट नेता गुरुङले संसदीय सुनुवाई विशेष समितिको सभापति पदको सपथ ग्रहण गर्नुभयो ।

सपथ ग्रहणपछि सञ्चारकर्मीहरुसँग कुरा गर्दै सुनुवाई समितिका नवनिर्वाचित सभापति गुरुङले विभिन्न निकायमा नियुक्तिका लागि सुनुवाई गर्नु पर्ने व्यक्तिको नाम समितिमा आए लगत्तै सुनुवाईको प्रक्रिया शुरु हुने बताउनु भयो ।

सत्तारुढ दल र प्रमुख प्रतिपक्षीबीचको फरक फरक अडानका कारण विगत सात महिना बढी समय सुनुवाई समिति गठन हुन नसक्दा प्रधानन्यायाधीशदेखि सर्वोच्च अदालतका अन्य प्रस्तावित न्ययाधीशहरु र सरकारले विभिन्न देशका लागि नियुक्तीको प्रस्ताव गरेका राजदूतहरुको सुनुवाई हुन सकेको छैन ।