अवैध कामदार पठाउने क्रम रोक्न र म्यानपावरलाई कारबाही गर्न निर्देशन

Posted on: June 22, 2016 | views: 194

८ असार, काठमाडौं ।
संसदको अन्तर्राष्ट्रिय सम्बन्ध तथा श्रम समितिले अवैध कामदार विदेश पठाउने क्रम रोक्न र त्यसरी पठाउने म्यानपावरलाई कारवाही गर्न सरकारलाई कडा निर्देशन दिएको छ ।

व्यवस्थापिका संसद अन्र्तगतको समितिको आजको बैठकले भारतीय विमानस्थल प्रयोग गरी अवैधानिक रुपमा तेस्रो मुलुकमा कामदार पठाउने क्रम रोक्न सरकारलाई निर्देशन दिएको छ । समितिले अफगानिस्तान लगायतका प्रतिबन्धित मुलुकमा अवैधानिकरुपमा कामदार पठाउने म्यानपावर कम्पनीमाथि कारवाही गर्न पनि निर्देशन दिएको हो ।

समितिले बुधबारको बैठकमा श्रम तथा रोजगार मन्त्रालय र परराष्ट्र मन्त्रालयका सचिवहरुलाई बोलाएर छलफल गरी काबुल घटनाको सत्य तथ्य पत्ता लगाउन तथा स्वदेश फर्कन चाहने नेपाली कामदारलाई नेपाल आउने व्यवस्था मिलाउन निर्देशन दिएको समिति सभापति प्रभु साहले जानकारी दिए ।

हिंसाग्रस्त मुलुक अफगानिस्तानको काबुलमा १२ जना नेपाली सुरक्षा गार्डको मृत्यु भएपछि बुधबार समितिको बैठक बसेको थियो । बैठकले भारतको बाटो हुँदै अवैधानिक रुपमा तेस्रो मुलुकमा कामदार पठाउने क्रम रोक्न कुटनीतिक पहल गर्न सरकारलाई निर्देशन दिएको समितिका सभापति साहले बताए । अफगानिस्तानमा गत असार ६ गते भएको आत्मघाती आक्रमणमा परेर मृत्यु भएका नेपाली मृतकका परिवारलाई उचित क्षतिपूर्ति तथा घाइतेहरुको उपचार गर्न नेपाल सरकारलाई निर्देशन दिइएको छ ।

म्यानपावर कम्पनीहरुले युवाहरुलाई धेरै तलब दिलाउने प्रलोभनमा पारी अवैधानिक रुपमा अफगानिस्तान, सिरिया, इराक लगायनतका हिंसाग्रस्त मुलुकमा पठाउने गरेका छन् । अफगानिस्तानमा मात्र अवैधानिक रुपमा पुगेका नेपाली कामदारको संख्या १० हजारभन्दा बढी रहेको सरकारको अनुमान छ ।

बैठकले मृत्यु भएकाहरुको शव तत्काल नेपाल ल्याउन हवाईजहाज पठाएकामा नेपाल सरकारलाई धन्यवाद दिँदै घटनाको सत्यतथ्य पत्ता लगाउन निर्देशन दिएको छ ।