भागबण्डा मिलाएर अधिवेशन गर्न खोजे दुर्घटना हुने नेविसंघका अध्यक्ष प्रत्यासीहरुको चेतावनी

Posted on: June 18, 2016 | views: 325

काठमाडौ, असार ४ । नेपाल विद्यार्थी संघको आसन्न महाधिवेशनमा अध्यक्ष पदको लागि उम्मेदवारी घोषणा गरेका उम्मेदवारहरुले भागबण्डा मिलाएर अधिवेशन गर्न खोजे ठूलो दुर्घटना हुने चेतावनी दिएका छन । 

नेपाल विद्यार्थी संघले आयोजना गरेको अन्र्तक्रियामा अध्यक्षका प्रत्यासी कुन्दन काफ्लेले अहिलेसम्म पार्टीको लविङको नेतृत्व मात्रै भएको नेविसंघको उम्मेदवार कोही पनि हुन नसकेको भन्दै फेरि पनि भागबण्डा गरेर अधिवेशन गर्न खोजे ठूलो दुर्घटना हुने चेतावनी दिए । 

उनले ११ जिल्लामा अझै पनि संगठनको अधिवेशन हुन नसकेको र अन्य तयारी नभएको अवस्थामा साउन २३ गतेकोलागि तय भएको संघको अधिवेशन तोकिएकै समयमा हुनेमा आशंका ब्यक्त गरे । 

उनले अबको संघको एजेण्डा राजनीतिक नभई शैक्षिक आन्दोलन हुनु पर्नेमा जोड दिदै संघकै दवावको कारण काग्रेस गणतन्त्रमा गएकोले अब पनि त्यस्तै नेतृत्वको आवश्यकता रहेकोमा जोड दिए । 

काफ्लेले मुलुकको शिक्षा नीतिमा परिवर्तन र शिक्षामा प्रत्येक विषयकालागि रिर्सच सेन्टर स्थापना गरेर शिक्षालाई आधुनिकिकरण गर्नु पर्नेमा जोड दिए । 

अर्का प्रत्यासी दिपक भट्टराईले नेविसंघका प्रतिनिधिहरुबाटै नेतृत्व छानेर गुट प्रबृत्तिको अन्त्य गरिनु पर्नेमा जोड दिदै अब विद्यार्थीबाट विद्यार्थीको नेतृत्व चयन हुनु पर्ने बताए । 

उनले गुटकै कारण नेविसंघ ईतिहासको सबैभन्दा कमजोर अवस्थामा पुगेको भन्दै अब अंकल पुस्ताबाट दाई पुस्तामा नेतृत्व ल्याउनु पर्ने धारणा राखे । 

भट्टराईले अब योग्यता र क्षमताको आधारमा नेतृत्व आउनु पर्ने भन्दै अबको विद्यार्थी आन्दोलनलाई तोडफोड र अराजकताबाट बाहिर निकाल्नु पर्नेमा जोड दिए । 

अर्का प्रत्यासी शुभराम बस्नेतले विद्यार्थी आन्दोलन अहिले ईतिहासकै कमजोर अवस्थामा रहेको दावी गर्दै आफूले यसलाई माथि उठाउन आफ्नो क्षमता र योग्यता प्रर्दशन गर्ने विश्वास ब्यक्त गरे । 

उनले मुलुकका सरकारी क्याम्पसहरुमध्ये आफू स्ववीयू सभापति रहेको शंकरदेव क्याम्पस अहिले पनि मुलुककै उत्कृष्ट रहेको दावी गर्दै आफूले ब्यवहारिक शिक्षमा जोड दिएर शिक्षामा आमुल सुधार ल्याउने दिशामा काम गर्ने प्रतिबद्धता ब्यक्त गरे । 

धनि र गरिब विचको खाडल अन्त्य गरेर शिक्षामा परिवर्तन ल्याउन सक्ने विश्वास ब्यक्त गर्दै  अब मुलुकको राजनीतिक विद्यार्थीबाटै उठाउने गरी अघि बढ्नु पर्नेमा बस्नेतले जोड दिए । 

बस्नेतले विद्यार्थी विचमा नरहेकाहरुसँग प्रतिष्पर्घा गर्नु पर्ने अवस्था विद्यमान रहेको भन्दै यो प्रथाको अन्त्य गरेर पुराना पुस्तालाई विदा गर्नु पर्ने बताए । 

क्षितिज भण्डारीले सबै पक्षलाई समेट्ने गरी आफूले उम्मेदवारी दिएको भन्दै संगठनलाई एकताबद्ध बनाउन भागबण्डा रहित ढंगले अघि बढ्ने प्रतिबद्धता ब्यक्त गरे । 

उनले नेपाल विद्यार्थी संघ ईतिहासकै सबैभन्दा कमजोर घडिमा रहेकोले मित्रवत प्रतिष्पर्घा गरेर नेतृत्व चयन गर्नु पर्ने भन्दै आफ्नो एजेण्डा शिक्षाको मार्फतबाट नैतिकबान दक्ष जनशक्ति उत्पादन गर्नु रहेको बताए । 

अर्का प्रत्यासी नैनसिंह महरले समयमै महाधिवेशन नगर्दा संगठन स्खलित अवस्थामा पुगेको भन्दै अब हरेक दुईं दुई वर्षमा महाधिवेशन गरेर नेतृत्व विकासमा जोड दिनु पर्ने बताए । 

उनले नेविसंघलाई काग्रेसकोलागि नेता र कार्यकता उत्पादन गर्ने फ्याक्ट्रीको रुपमा विकास गर्नु पर्ने धारणा राख्दै नेविसंघको संगठनलाई विद्यालय विद्यालय सम्म पुर्याउनु पर्ने आवश्यकता औल्याए । 

यद्यपि उनले माध्यमिक तहसम्म भने राजनीतिकरण नगरी शिक्षालाई प्राविधिक र जीवनउपयोगी बनाउने तर्फ ध्यान दिनु पर्ने सुझाव दिए ।